VIKEKE, 08 Janeiru 2026 (TATOLI)—Autoridade Makadike de Baixo no Suku Makadike Uaitame, Postu Administrativu Uatulari, Munisípiu Vikeke, seidauk iha sede suku atu uza ba atendimentu populasaun.
“Ami nu’udár suku foun seidauk iha sede suku permanente. Oras ne’e ami uza provizória de’it sede aldeia,” Xefe Suku Makadike de Baixo, Rogério da Silva hateten ba TATOLI iha Postu Vikeke Vila, Kinta ne’e.
Nia haktuir planu konstrui sede suku sira aprezenta ona ba Ministériu Administrasaun Estatál (MAE) no Autoridade Munisípiu Vikeke hodi tau ba planu Programa Nasionál Dezenvolvimentu Suku (PNDS).
“Ami-nia planu sira-ne’e ha’u aprezenta hotu ona. Fatin ba konstrusaun sede suku nian, ami identifikadu ona. Ami hein kuandu orsamentu PNDS aloka ba ami-nia suku ami bele konstrui ona,” nia hato’o.
Iha fatin ketak, Xefe Suku Makadike Uaitame, José Pinto Soares haktuir Suku Makadike Uaitame mós daudaun ne’e seidauk iha sede suku própriu.
“Ami agora uza de’it sede suku provizóriu ho medida 9×6 ne’ebé harii husi inisiativa autoridade lokál hamutuk ho komunidade. Ami-nia esperansa iha tinan ida-ne’e Governu bele konstrui ami-nia sede suku, atu ami uza ba atendimentu populasaun,” nia subliña.
Iha sorin seluk, Diretór PNDS Munisípiu Vikeke, Francisco Soares Varela hateten kona-ba suku foun rua iha Uatulari ne’ebé seidauk iha sede suku ne’e posibilidade sei harii iha tinan ida-ne’e.
“Programa PNDS ba Munisípiu Vikeke seidauk implementadu. Ami sei iha prosesu elaborasaun ba planu kada suku. Ami sei aprezenta ba Prezidente Autoridade Munisípiu. Bainhira iha ona orientasaun hafoin ita implementa. Maibé, ba suku foun rua ne’ebé iha Uatulari seidauk iha sede suku ne’e, ami hanoin ona no tau ona ba planu prioridade iha tinan ida-ne’e. Tanba ne’e mak ami sei halo diskusaun ho PAM hodi deside ba konstrusaun sede rua ne’e. Iha tinan ne’e orsamentu ne’ebé aloka ba ami PNDS purvolta milaun ida resin hodi kobre ba planu PNDS nian,” nia esplika.
Tuir dadus, populasaun Suku Makadike Uaitame hamutuk iha aldeia neen ho totál uma-kain 340 no totál populasaun hamutuk na’in-899. Enkuantu, Suku Makadike de Baixo iha aldeia hamutuk hitu (7) ho uma-kain hamutuk 400, totál populasaun hamutuk na’in-650.
Jornalista: Vitorino Lopes da Costa
Editór: Xisto Freitas da Piedade
