DILI, 30 novembru 2024 (TATOLI)-Komandante Interinu Sentru Formasaun Polísia (CFP, sigla portugés), Superintendente Polísia Emilio dos Santo relata katak Ministériu Ensinu Superiór Siénsia no Kultura (MSSK) aseita ona pedidu Polísia Nasionál Timor-Leste (PNTL) ba estabelesimentu Institutu Superiór Siénsia Polísia (ISSPol) no Akademia Polísia.
“Ensinu Superiór aseita ona pedidu husi PNTL ba instalasaun Institutu Superiór Siensia Polísia no Akademia Polísia tanba ita priense rekezitu ne’ebé mai husi Ensinu Superiór,” Superintendente Polísia Emilio hateten ba jornalista iha Sentru Formasaun Polísia, sábadu ohin.
Komandante ne’e dehan, PNTL agora daudaun ejiste mak Sentru Formasaun Polísia no Sentru Formasaun ne’e eziste nanis maibé Institutu Superiór Siénsia Polísia no Akademia Polísia mak seidauk iha nune’e tinan ne’e Komandu Jerál PNTL submete dokumentu Ministériu Ensinu Siénsia Kultura atu estabelese eskola rua ne’e no hetan ona aseitasaun.
“Sira halo tiha ona avaliasaun dala tolu no tempu-badak iha dezembru nia laran sira sei audiensia ho ami para oinsá mak atu haree fila fali submisaun dokumentu sira ne’e kompleta ona ga seidauk. Sé seidauk kompleta Polísia Nasionál Timor-Leste liuhusi ekipa instaladora ba ISSPOL sei esforsu para haree atu nune’e 2025 ne’e bele hetan lisensa ba ninian operasionalizasaun,” nia adianta.
Komandante Emilio hateten, agora dadaun Komandu Jerál presiza kria estatutu no rejime interna ba kriasaun Institutu Superiór Siensia Polísia no Akademia Polísia tanba tuir lei orgánika PNTL haktuir katak kriasaun Institutu Superiór Siensia Polísia tenke iha nia estatutu no rejime interna rasik.
“Entaun ita fiar katak Komandu Jerál ho Ministeriu Interiór sei haree asuntu ida-ne’e hodi konklui,” nia afirma.
Autoridade polisiál ne’e dehan, Institutu Superiór Siénsia Polísia no Akademia Polísia sei iha fakuldade ida no departamentu rua mak mak jestaun administrasaun no departamentu kriminolojia.
“Ita iha rekursu umanu no rekursu finanseira atu halo ida-ne’e tanba ita iha doutoramentu na’in rua ba eskola ida-ne’e depois ita iha mestradu na’in-50 resin para priense ba departamentu rua ne’ebé ita loke,” nia konklui.
Jornalista: Natalino Costa
Editór: Rafael Ximenes de A. Belo
