DILI, 07 Janeiru 2026 (TATOLI)—Konsellu Ministru aprova Dekretu-Lei ne’ebé aprezenta husi Ministru Interiór, relasiona ho alterasaun dahuluk ne’ebé estabelese Orgánika Servisu Migrasaun (SM) nian, ho objetivu atu konsolida modernizasaun no hametin efisiénsia operasionál jestaun migrasaun nian iha Timor-Leste.
Ministru Interiór, Francisco da Costa, hateten iha parte migrasaun nian ami halo revizasaun uitoan tanba iha problema deskoordenasaun servisu ho gabinete sira inklui delegasaun territoriál, ne’e falla tanba hadau malu kompeténsia.
“Hanesan iha postu fronteira liga ho entaun iha problema uitoan tanba ne’e mak ami halkon tiha delegasaun territoriál ita hamosu fali koordenadór ida hodi bele koordena servisu sira-ne’e hotu ho efisiénsia,” Ministru ne’e hateten ba jornalista sira iha Palásiu Governu, ohin.
Alterasaun dahuluk ida-ne’e halo ajustamentu estruturál sira-ne’ebé importante liu ho alvu ba organizasaun servisu migrasaun nian, ho foku ba área prinsipál tolu mak sentraliza koordenasaun servisu apoiu nian, hametin kapasidade jurídika no institusionál nomós halakon redundánsia organizasionál.
Aleinde ne’e, alterasaun ne’e introdús Koordenadór-Jerál ida ba Servisus Apoiu, ne’ebé responsável ba koordenasaun integrada husi gabinetes apoiu nian, sentraliza no espesializa estrutura jurídika hodi transforma sai Diresaun Nasionál Servisus Jurídiku, Azilu no Refujiadu, no mós halakon delegasaun territoriál sira, hodi konsentra atividade operasionál tomak iha postu fronteira sira.
Tanba, nia dehan, alterasaun ida-ne’e nu’udar pasu ida tan iha modernizasaun kontínua setór fronteira nian, hodi konsolida sistema migrasaun ida-ne’ebé efisiente, lais no espesializadu liu.
Enkuantu, implementasaun estrutura organizasaun foun ida-ne’e sei permite Servisu Migrasaun atu hatán ho efetivu liután ba dezafiu kontemporáneu mobilidade internasionál nian, hodi mantein padraun profisionalizmu ne’ebé aas no kumpre padraun internasionál jestaun fronteira nian.
Iha biban ne’e, Governu aprova proposta husi Ministru Interiór ba nomeasaun Superintendente-Xefe Polísia Nasionál Timor-Leste, Natércia Eufrásia Soares Martins, ba kargu Diretora Ezekutiva Servisu Migrasaun nian, ho komisaun servisu, ba períodu tinan tolu, ne’ebé bele renova dala ida ba períodu hanesan, tanba nia iha abilidade téknika, aptidaun no esperiénsia profisionál ne’ebé presiza hodi hala’o kna’ar ne’e.
Ida-ne’e hodi konsidera dezafiu kontemporáneu sira iha kontrolu migrasaun nian, inklui aumentu iha mobilidade umanu, dezafiu sira-ne’ebé mosu relasiona ho seguransa sibernétika no terrorizmu transnasionál, no mós nesesidade atu promove ambiente ida-ne’ebé favoravel ba turizmu, investimentu no dezenvolvimentu ekonómiku sustentável.
Nune’e, Governu konsidera hanesan iha vantajen hodi nomeia polísia ida hosi Polísia Nasionál Timor-Leste ne’ebé iha esperiénsia no komandu ne’ebé sufisiente atu dirije Servisu Migrasaun.
Jornalista : Alexandra da Costa
Editór : Cancio Ximenes
