DILI, 08 Janeiru 2026 (TATOLI) – Primeiru-Ministru (PM), Xanana Gusmão, lansa ohin sistema FreeBalance’s Government Resource Planning (GRP) 2026 nian.
Iha ámbitu lansamentu ne’e, Xefe Governu husu ba dirijente instituisaun Estadu sira atu tinan foun ida-ne’e ezekuta Orsamentu Jerál Estadu (OJE) ho di’ak no tenke nakonu ho responsabilidade, kompromisu atu serbí, onestidade no iha espíritu korrije saida mak ladi’ak.
“Ita halo tinan 24 ukun-an, ita liu tiha ona funu tinan 24. Funu tinan 24 povu terus liu, maibé fásil hakat liu, maibé tinan 24 ukun-an iha prosesu harii Estadu, nasaun susar tebes. Harii Estadu husi Prezidénsia Repúblika, Parlamentu Nasionál, Governu, ho Justisa. Kuandu laiha kompromisu husi ukun-na’in sira no ita hotu ne’ebé iha responsabilidade, buat la la’o ba oin maibé hakiduk fali”, Xanana Gusmão hateten iha auditóriu Ministériu Finansa, Aitarak-Laran, Dili, ohin.
Nune’e nia husu ba hothotu atu hahú tinan foun, hothotu tenke simu responsabilidade atu serbisu ho di’ak, tanba la’e buat hotu lala’o ba oin.
“Kuandu ita hotu ne’ebé serbisu iha instituisaun Estadu la kaer ita-nia devér mak ita temi fali konstrusaun susar tebes. Ha’u iha konfiansa katak bainhira imi hotu haka’as-an, ita la’ós atu sai ezemplu ida ba mundu, maibé pelumenus la sai ezemplu aat ida”, nia dehan.
Tanba ne’e, atu ezekuta osan ho di’k mak tenke mai husi planeamentu orsamentu, aprovizionamentu no finansa no tenke tau iha ulun katak osan povu nian jere ho di’ak.
“Hothotu esforsu an ba. Tinan ida-ne’e ita tenke hatudu ba povu, ita hadi’a. Tinan ida seluk imi tenke hatudu ba povu, ita harii liután ona. Nune’e, aproveita sensaun ida-ne’e hadi’a ita-nia kbiit atu serbí iha idaidak nia instituisaun Estadu. Hanoin ida de’it, serbisu ba rai no povu ida-ne’e”, Xanana husu.
Vizaun jerál husi Sistema GRP mak Kódigu Aprovizionamentu no Kontratasaun Públika Timor-Leste fó énfaze maka’as liu ba iha prinsípiu value for money, katak “hetan kombinasaun obra, bens no servisu ne’ebé di’ak liuhusi kustu sira tantu durasaun, kualidade, nomós sustentabilidade hodi hatán ba nesesidade públiku ho efisiénsia, efikásia no atinje objetivu ekonómiku, sosiál no ambientál.
Nia objetivu prinsipál mak husi kódigu ida-ne’e inklui garante utilizasaun rekursu públiku hothotu ho responsavel, transparénsia no apoiu dezenvolvimentu ekonómiku sustentavel, haktuir artigu 15 & 23 prinsípiu prosesamentu eletróniku & sistema informátiku mandatóriu ba servisu no entidade setór públiku sira tenke uza meiu eletróniku aprovizionamentu no kontratasaun hodi promove efisiénsia no transparénsia administrativa.
Iha biban ne’e, Primeiru-Ministru akompaña husi Ministra Finansa, Santina Cardoso, entrega simbolikamente orsamentu aprovadu 2026 ba instituisaun Estadu sira.
Notísia relevante: MF disemina regra no prosedimentu ezekusaun OJE 2026 ba instituisaun Estadu sira
Jornalista: Arminda Fonseca
Editora: Maria Auxiliadora
