DILI, 07 Janeiru 2026 (TATOLI)—Servisu Migrasaun rejista movimentu ema tama no sai husi territóriu nasionál hamutuk 808.463 durante tinan 2025.
“Movimentu sira ho klasifikasaun ema tama bá territóriu nasionál 396.290 no ema sai hamutuk 412.173,” Diretora Servisu Migrasaun Superintendente Asistente Polísia Adelaide da Rosa, informa iha ninia knaar fatin, Vila-Verde, Kuarta ne’e.
Aleinde ne’e, Autoridade Migrasaun rekuza entrada estranjeiru hamutuk ema 126 tanba la priense rekezitu tama territóriu nasionál tuir Lei Migrasaun no Azilu Timor -Leste.
Diretora informa liután, Servisu Migrasaun iha tinan 2025 fó mós apoiu repartriasaun ba sidadaun estranjeiru hamutuk ema na’in-38 bá nasaun orijen.
“Sidadaun hirak ne’e maioria husi sidadaun husi nasaun viziñu (Indonézia) ne’ebé mak Servisu Migrsaun konsege repatria feto 20-resin ne’ebé mak sira-nia prosesu hala’o antes. Kona-ba violasaun doméstika (kazu uma laran) no depoizde prosesu sira husu filafali bá sira-nia nasaun orijen,” nia esplika.
Notísia relevante : Sidadaun Estranjeiru Tenke Komunika Bainhira Movimentu
Superintendente Asistente Adelaide dehan, Servisu Migrasaun durante tinan 2025 konsege repatria mate-isin na’in-12 bá nia nasaun orijen.
Rejista mós kazu violasaun ba Lei Migrasaun iha prosesu administrativu iha ema na’in-399.
Autoridade Migrasaun halo mós espluzaun ba ema na’in-ida, prosesu krime ba ema na’in-35, inklui abandona voluntáriu ho totál ema 16.
“Totál kazu hotu hamutuk 585,” nia katak.
Maski nune’e, violasaun vistu ne’ebé komete husi sidadaun estranjeiru iha tinan 2025 konsege sofre redusaun kompara husi tinan 2024.
Jornalista : Natalino Costa
Editora : Julia Chatarina
