MF disemina regra no prosedimentu ezekusaun OJE 2026 ba instituisaun Estadu sira
DILI, 08 Janeiru 2026 (TATOLI)-Ministériu Finansa (MF) halo diseminasaun, entre loron 08 no 09 Janeiru, kona-ba regra no prosedimentu husi dekretu-lei ne’ebé regula ezekusaun Orsamentu Jerál Estadu (OJE) 2026, inklui aprovizionamentu no autorizasaun despeza no kontrolu orsamentál ba instituisaun Estadu sira.
Ministra Finansa, Santina Cardoso, hateten antes MF loke sistema ba ezekusaun orsamentál hafoin taka konta jerál OJE 2025 iha 31 Dezembru, iha 03 Janeiru 2026, ministériu presiza reimporta dadus orsamentu 2026 nian ba iha sistema atu hahú ezekusaun.
“Iha loron 03-04 Janeiru 2026, ami prepara semináriu ida atu bolu diretór-jerál husi liña ministeriál hotu, liuliu sira ne’ebé responsavel ba planeamentu no orsamentu nian atu fó informasaun kona-ba regra sira ba ezekusaun OJE 2026, komesa husi Lei Enkuadramentu OJE, Jestaun Finansa Públika, Lei Aprovizionamentu, regulamentasaun, nomós dekretu-lei ezekusaun nian”, Santina Cardoso hateten iha Ministériu Finansa, Aitarak-Laran, Dili, ohin.
Nia dehan atu tama ba ezekusaun OJE foun ne’e, iha lei lubuk ida ne’ebé presiza atu hatene, liuliu bainhira iha alterasaun ruma iha lei sira ne’ebé presiza atualiza. “Aban, ha’u hanoin ami komesa loke ona sistema ba sira hotu komesa ezekuta OJE 2026 nian”, nia adianta.
Ho mudansa balun ba regra ezekusaun ne’e mak Ministériu Finansa instrodús iha 2026 prosesu aprovizionamentu nian. Ministériu husi inísiu hatama ona informasaun husi planu aprovizionamentu to’o nia ezekusaun iha sistema E-procurement, katak informasaun hotu ne’e sei tau iha sistema aprovizionamentu nian ne’ebé sei lansa iha tempu badak.
“Ida-ne’e ho objetivu atu promove transparénsia ein termu jestaun ba kontratu publiku sira, nune’e bele fasilita públiku akompana, nomós ba setór privadu sira iha 2026 ne’e bainhira hatama dokumentu ka proposta ba aprovizionamentu atu partisipa iha kontratu sira ne’e tenke hatama online”, dehan.
Tuir Santina Cardoso, ida-ne’e faze ida ne’ebé Ministériu Finansa instrodús iha tinan ida-ne’e, nune’e informasaun hotu ba prosesu tomak iha sistema nia-laran. “Ami hatene katak sei iha difikuldade balun ba internét no buat hirak ne’e, maibé ministériu ho ekipa tomak sei estabelese help desk ida atu asiste liña ministériu, nomos karik setór privadu sira enfrenta problema ruma bele fasilita no ezekusaun Governu tomak nian”, nia hateten.
Hodi realsa katak iha ezekusaun ne’e buat foun seluk mak ba kategoria balun hanesan viajen lokál, viajen estranjeiru, nomós formasaun ne’e iha nia alokasaun, maibé depoizde alokasaun ne’ebé orijinál iha kada entidade nian kuandu hotu ona sira labele muda fali orsamentu seluk atu reforsa, katak hothotu tenke komesa foku liu hadi’a sira-nia planeamentu nomós ezekusaun.
“Aumezmu tempu mós ami introdús katak presiza iha relatóriu ezekusaun nian kada trimestre, presiza iha atualizasaun iha liña ministériu sira atu kompara osan hira mak sai no dezempeñu ba programa nian ne’e oinsá”, katak.
Koordenadór Apoiu Jurídiku iha Ministériu Finansa, Isac Menezes, hateten lei sira ne’ebé disemina mak inklui Lei númeru 3/2025, loron 23 Abríl, kona-ba Enkuadramentu Orsamentu Jerál Estadu no Jestaun Finanseira Públika; Dekretu-Lei númeru 42/2025, loron 15 Dezembru; Regulamentu Lei númeru 3/2025, loron 23 Abríl kona-ba Enkuadramentu Orsamentu Jerál Jestaun Finanseira Públika; Dekretu-Lei númeru 41/2025, loron 15 Dezembru, kona-ba Ezekusaun Orsamentu Jerál Estadu 2026; no Dekretu-Lei númeru 1/2025, loron 8 Janeiru, kona-ba Kódigu Aprovizionamentu Kontratu Públiku.
Tuir nia, importante tebes divulga lei sira ne’e atu jestór sira hatene, nune’e iha ezekusaun OJE ba tinan ne’e bele la’o ho di’k no tuir duni regra no lei sira ne’ebé iha.
Notísia relevante: Governu taka konta jerál OJE 2025 ho ezekusaun 70% ne’ebé inklui seguransa sosiál
Jornalista: Arminda Fonseca
Editora: Maria Auxiliadora
