DILI, 12 Janeiru 2026 (TATOLI)—Ministru Negósiu Estranjeiru no Kooperasaun (MNEK), Bendito dos Santos Freitas, hala’o vizita traballu hodi dezloka bá Portugál husi 14-21 Janeiru ne’e, hodi halo koordenasaun kona-ba Timor-Leste atu simu Prezidénsia rotativa Komunidade Sira Nasaun Ko’alia Lian Portugés (CPLP-sigla portugés) períodu 2026-2027.
Vizita traballu ne’e iha kontestu Prezidénsia rotativa CPLP Timor-Leste nian bazeia ba desizaun ne’ebé foti iha primeiru Konferénsia Xefe Estadu no Xefe Governu CPLP iha fDezembru 2025.
Tuir nota ne’ebé TATOLI asesu katak, durante iha Portugál, Ministru Bendito Freitas sei hala’o enkontru Koordenasaun kona-ba prezidénsia timoroan nian, entrega estatutu revizaun (versaun Luanda) ne’ebé ratifika husi Parlamentu Nasionál Timor-Leste ba Sekretária Ezekutiva CPLP, Maria de Fátima Jardim, iha Sede CPLP Lisboa, Portugál.
Iha tempu hanesan, sei hala’o enkontru estraordinária CPLP nian kona-ba Komité Konsertasaun Permanente.
Ministru Bendito Freitas mós sei hala’o enkontru kortejia ho nia omológu Ministru Estadu no Negósiu Estranjeiru Repúblika Portugeza, Paulo Rangel, hodi aborda kona-ba reforsu kooperasaun bilaterál entre nasaun rua, inklui situasaun polítika ne’ebé akontese iha Giné-Bisau no mós Prezidénsia CPLP ne’ebé Timor-Leste sei assume durante tinan ida (2026-2027).
Governante ne’e iha mós oportunidade hodi hasoru malu ho Laureadu Nobel da Paz, Dom Carlos Filipe Ximenes Belo, SDB, iha Lisboa no hasoru malu mós ho estudante no komunidade Timor-oan sira iha Coimbra, Portugál.
TATOLI
