DILI, 05 Janeiru 2026 (TATOLI)—Polísia Nasionál Timor-Leste (PNTL) liuhusi Diresaun Servisu Investigasaun Kriminál, iha Kuarta (31/12/2025) ne’e, halo ona identifikasaun ba sidadaun feto ida husi Atambua, Indonézia ho inisiál FN, ne’ebé suspeitadu falsifika dokumentu hodi sai benefisiáriu ba pensaun Veternu.
Diretór Servisu Investigasaun Kriminál Nasionál, Superintendente Polísia João Belo dos Reis, informa, sidadaun Indonézia ne’e tuir informasaun iha Tersa (30/12/2025) simu ona osan veteranu, nune’e iha loron Kuarta bainhira atu fila bá Atambua, foin mak to’o iha Batugade, Servisu Sekretu sira informa ba Autoridade sira iha Batugade hodi la fó liu.
Liután, Autoridade Batugade komunika kedan ba Diresaun Servisu Investigasaun Kriminál Nasionál (DSIKN) hodi asegura sidadaun ne’e.
“Ami hetan informasaun, ami-nia informadu infiltra kleur tiha ona ba dadus sira ne’ebé mak deskonfia sidadaun estranjeiru ou falsifikasaun poténsia mosu iha parte ministériu relevante nian, nune’e ami akompaña no ami infiltra ami-nia servisu informasaun sira hodi rekolla sé sé mak halo falsifikasaun sira hanesan ne’e. Ikus mai ami deteta katak señora ne’ebé mensiona ba publikasaun ne’e no iha envolvimentu forte iha faktus katak ema balun husi Timor-Leste fasilita ita-nia inan-feton ne’e hodi sai veterana, mezmu ke ita-nia lei ida-ne’e rasik bandu atu simu pensaun veteranu ne’ebé hasai,” João Belo hateten ba Jornalista sira iha ninia knaar fatin, Kaikoli, Segunda ne’e.
Notísia relevante : Sidadaun Indonézia ne’ebé falsifika dokumentu hodi simu pensaun veteranu, asegurada iha DSIK
Tuir prosesu identifikasaun ba kazu ne’e, suspeita deklara katak nia iha Billete Identidade (BI) no kartaun Eleitorál. Nia agora hela ho nia família sira iha Dili laran maibé nia dokumentu komprovativu sira daudaun DNSIK asegura hela.
“Daudaun nia dokumentu sira ita asegura hela. Agora ita autoriza nia hela ho nia-família iha Dili laran tanba prosesu sei la’o,” nia akresenta.
Iha parte seluk, Polísia submete ona kazu ne’e ba Ministériu Públiku (MP) nune’e suspeitada sei responsabiliza prosesu judisiál iha Timor-Leste.
“Tanba aktu krime ne’e akontese iha ne’e, maka prosesu sei la’o iha ne’e,” nia tenik.
Autoridade Seguransa mós bolu ona autór ne’ebé fasilita dokumentu ba FN hodi simu pensaun veteranu, nune’e bele submete ba prosesu investigasaun.
“Balun seidauk, maibé ami hein delegasaun kompeténsia tuir mai ami sei bolu tan. Hahalok sira hanesan nu’udar falsifikasaun no la valoriza mós luta-na’in sira ne’ebe tuir loloos hetan. Ida-ne’e ami konsidera grave no tenke hetan atensaun sériu husi Estadu, liuliu parte sira ne’ebé mak prodús dokumentu sira,” nia katak.
Parte PNTL mós sei halo koordenasaun ho Parte Notariadu Ministeriu Asuntu Kombatente no Libertasaun Nasionál (MAKLN) nian para bele buka tuir kazu ne’e.
“Suspeitu ba kazu hanesan ne’e sei iha, ami simu informasaun sira hanesan ne’e barak no ami sei buka tuir sé sé mak fasilita, ita sei halo identifikasaun ba sira,” nia hato’o.
Jornalista : Natalino Costa
Editora : Julia Chatarina
