DILI, 06 Janeiru 2026 (TATOLI)—Asosiasaun Futeból Munisipál rua seidauk realiza kongresu hodi hili estrutura períodu 2026-2030.
Diretór Departamentu Dezenvolvimentu Asosiasaun Membru Federasaun Futeból Timor-Leste (FFTL), Iduk Vicente, esplika Asosiasaun Futeból rua referida mak Asosiasaun Futeból Munisipál Baukau no Asosiasaun Futeból Munisipál Dili Oeste ne’ebé seidauk realiza kongresu estraordináriu tanba sei ajusta rekezitu balun ne’ebé kontesta husi kada membru futeból iha asosiasaun rua referida.
“Tuir loloos iha tinan-2025 maibé mosu rekursu administrativu husi membru asosiadu sira ligadu irregularidade no deskonfia mosu manipulasaun dokumentu, entaun sei adia antes realiza kongresu estraordináriu,” Iduk Vicente informa ba TATOLI iha ninia kna’ar fatin, Bairros dos Grilos, Tersa ne’e.
Iduk relata Asosiasaun Futeból Munisipál Baukau iha ona faze preparasaun maibé mosu rekursu husi membru balun relasiona ho deskonfia mosu fallansu administrativa ne’ebé hala’o iha asosiasaun ne’e nune’e sei iha rekomendasaun husi departamentu legál antes realiza kongresu.
Enkuantu, Asosiasaun Dili Oeste rasik seidauk realiza kongresu tanba mosu kontestasaun husi membru relasiona ho karta notifikasaun ne’ebé FFTL hato’o ba estrutura atuál iha Dili Oeste ne’ebé konsideradu tarde informa ba membru nune’e membru lima hato’o pedidu objesaun ofisiál ligadu ho prosedimentu mekanizmu kongresu nian ba FFTL.
“Kuandu rekursu sira-ne’e loos hotu ona sira sei anúnsia lista kandidatura hodi realiza kongresu,” Iduk akresenta.
Nia hateten, durante tinan-2025, estrutura asosiasaun membru lima mak termina mandatu hanesan Asosiasaun Dili Leste, Asosiasaun Futsál Timor-Leste no Asosiasaun Juveníl, ne’ebé realiza ona kongresu, enkuantu Baukau no Dili Oeste tuir planu sei realiza iha fulan-ne’e antes kontinua ba kongresu FFTL iha fulan-Fevereiru.
Aleinde ne’e, Asosiasaun Ermera mak ordinariamente hala’o kongresu mezmu seidauk termina mandatu tanba prezidente asosiasaun lakon vida nune’e obrigadu realiza kongresu hodi hili estrutura iha finde 2025 liubá.
Entretantu, totál asosiasaun membru FFTL hamutuk 19 kompostu husi asosiasaun munisipál 14 no asosiasaun profisionál lima.
Jornalista: Natalino Belo
Editór: Xisto Freitas da Piedade
