DILI, 04 Fevereiru 2026 (TATOLI)—Sekretáriu Estadu Komunikasaun Sosiál, Expedito Dias Ximenes, hateten, IX laiha relasaun ho Tribunál Rekursu (TR) nia akordaun ba Antigu Prezidente Konsellu Administrasaun Rádiu Televizaun Timor-Leste, Empreza Públika (RTTL, E.P), Gil da Costa ‘Naldo Rei’ atu husu Estadu Timor-Leste rekopensa ho montante $68.094.
Tuir TR nia akordaun, Estadu tenke selu rekompensaun tanba antes ne’e VIII Governu liuhusi Sekretáriu Estadu Komunikasaun Sosiál, Merício Juvinal dos Reis ‘Akara’ ezonera Antigu Prezidente Konsellu Administrasaun RTTL, E.P, Naldo Rei la tuir prosedimentu legál.
“Ne’e laiha relasaun ho Governu ida-ne’e, ne’e relasaun ho VIII Governu,” Sekretáriu Estadu Expedito, hateten ba Jornalista sira iha sala Sekretaria Estadu Komunikasaun Sosiál (SEKOMS), iha Palásiu Governu, Kuarta ne’e.
Notísia relevante : Tribunál Rekursu hasai akordaun husu Estadu selu rekompensasaun ba antigu Prezidente RTTL Naldo Rei
Nia hatutan: “Ne’e so VIII Governu, liuliu ba ema sira ne’ebé dirije Governu, laiha relasaun ho Governu ida-ne’e.”
Governante ne’e nota, Tribunál nia desizaun ba kazu ida-ne’e sita katak Estadu tenke selu, maibé la temi Governu ida-ne’ebé.
“Tanba Tribunál hateten katak Estadu, Estadu ne’e signifika VIII Governu ne’e, la’ós agora, tanba señór Gil ne’e iha VIII Governu,” nia fundamenta.
Sekretáriu Estadu katak, daudaun ne’e nia parte seidauk simu notifikasaun ruma relasiona ho kazu ne’e.
“Lae, ha’u la simu notifikasauun, ami seidauk hatene tan, ami rona de’it mós iha notisia,” nia tenik.
Jornalista : Natalino Costa
Editora : Julia Chatarina
