DILI, 02 Jullu 2026 (TATOLI)—Diretór Kompras iha Institutu Nasional Farmasia Produtu Medikamentu (INFPM), Sergio Belo, hateten estoke ba vítamina inan isin-rua sira-nian daudaun ne’e estoke out iha armajen sentrál maibé ekipa sira esforsu atu dada fali husi armajen rejionál tolu hanesan Baukau, Ainaru no Bobonaru.
Diretór Kompras iha Institutu Nasional Farmasia Produtu Medikamentu (INFPM), Sergio Belo, hateten kona-ba vítamina ba inan isin-rua sira iha armajen sentrál laiha maibé iha rejionál tolu ba vitamina SF ka Ferrous Sulfate ho asadu ne’e iha hela.
“Iha armajen tolu ne’e estoke sei iha mak daudaun ne’e sira halo hela ezersisiu atu dada fali balun mai, no horisehik ami ho HNGV halo hela diskusaun iha ne’e. Horisehik ami simu tiha hotu no estoke ne’ebé mak la disponivél ami halo diskusaun horisehik hodi foti alternativa no balun ne’ebé mak seidauk mak ita buka hela dalan atu bele atende,” Sergio Belo hateten ba Jornalista sira iha nia kna’ar fatin, Kampung Alor, ohin.
Nia hateten, INFPM planeia atu dada fali estoke sira iha armajen rejionál sira hodi atnde fila-fali ba iha Nasionál.
“Horisehik foti iha ona solusaun ba estoke ne’ebé iha Hospoitál Nasionál Guido Valadares laiha ne’e. Ami planu atu dada fali husi rejionál tolu hanesan husi Bobonaru, Baukau no Ainaru, tanba vítamina ne’e foin daudauk ita estoke iha hela maibé iha problema uitoan, entaun ita reorder fila-fali atu mai fali. Ne’ebé, tempu badak nia sei mai maibé atu nia rezerva iha rejionál tolu ne’e para ita atu resolve,” nia dehan.
Nia esplika, kona-ba vítamina inan isin-rua iha lista kuantifikasaun ne’e nia tama tanba vítamina ne’e barak loos.
“Vítamina A, B, C, B2, B1 ne’ebé vítamina barak loos no baibain bolu multivitamina maibé refere ida-ne’e ba inan isin rua atu aumenta raan nian ho ida-ne’e mak hadi’a oan fatin ida-ne’e mak laiha, tanba ida-ne’e ita konsidera importante loos,” nia esplika.
Tanba nia iha lista kuantifikasaun maibé vítamina tama tiha mak iha mundansa kór tiha entaun diresaun nasionál farmásiátiku foti alternativa hodi hapara, tuan depois mak hatama mai fali tanba ai-moruk ne’e iha problema uitoan ne’e mak ita order fila-fali,” nia dehan.
Nasaun sira-ne’ebé mak Institutu Nasionál Farmásia Produtu no Médiku ba sosá ai-moruk mak hanesan nasaun Indonézia, Índia, Xina no Austrália fatin ne’ebé mak hodi sosa ai-moruk fatin mak ida-ne’e .
Iha fatin hanesan, Diretór Servisu Saúde Munisípiu Dili Mateus Pinto informa,vítamina iha maibé vítamina suplementu mikronutriente ne’e dadaun ne’e laiha duni.
“Maibé ba vítamina seluk iha, maibé vítamina ba inan isin-rua ne’e la iha duni, la’ós ami mak la distribuisaun ida tanba estoke out iha nasionál. Kona-ba estoke out ne’e seidauk tinan, maibé fulan hirak ona ha’u ladún hatene,” nia dehan.
Jornalista : Felicidade Ximenes
Editór : Cancio Ximenes
