HNGV sei anunsia rekrutamentu ba profisionál saúde iha 07 Setembru
DILI, 02 Setembru 2026 (TATOLI)—Diretór Servisu Apoiu Diagnóstiku no Terapêutika Iha Hospitál Nasionál Guido Valadares (HNGV), Vidal de Jesus Lopes, hateten HNGV sei anunsia rekrutamentu ba profisionál saúde iha loron 07 fulan-Setembru, tanba rekrutamentu sei loke ba públiku hahú iha 07 to’o 18 Setembru 2026.
“Prosesu rekrutamentu ita hatene katak tenke tuir prosesu sira-ne’e no lao tuir koordenasaun Ministériu Saúde, Hospitál Nasionál Guido Valadares no Komisaun Funsaun Publika ne’ebé define ona. Time line aprovadu ona husi parte ekipa juri sira, la’o tuir servisu tuir time line ne’ebé mak iha, nune’e prosesu sira-ne’e kuaze konklui ona. Ita hein de’it ninia implementasaun. Tentativmente tuir time line ne’ebé mak iha katak ita sei anunsia vaga ba publiku iha loron 07 to’o 18 Setembru ne’e aplikante ba vaga refere sei hatama dokumentu,” Vidal de Jesus Lopes, hateten ba jornalista sira, iha HNGV, ohin.
Nia esplika, prosesu sira-ne’e tuir faze tolu mak fazedahuluk prosesu selesaun dokumentu, daruak teste eskrita ne’e sei liu husi sistema ne’ebé mak iha ona Komisaun Funsaun Publika, datoluk ekipa juri sei halo entervista depois aplikante sira-ne’ebé mak liu ona faze tolu ne’e sira merese sai ona funsionáriu.
“Kritériu sira-ne’e lubuk ida, tanba ne’e banhira vaga taka sai mak ita-boot sira asesu iha ne’eba,” nia dehan.
Nia husu ba ema hotu katak HNGV presiza rekursu umanu atu servisu liuliu iha área saúde nian, tanba ne’e ema hotu iha direitu atu aplika vaga ida-ne’e no HNGV laiha familiarismu iha laran.
“Ita-boot sira hatene teste liuhusi KFP ne’e rigorozu, prienxe hotu ida-idak sai mai hatene ona nia rezultadu. Tanba ne’e mak informasaun falsa sira iha li’ur dehan ema iha laran ne’e ita la asegura ida-ne’e, tanba ida-ne’e mak ema hotu iha direitu liuhusi mekanizmu sistema la’o ho transparánsia, nune’e la’o tuir prosesu normál, Timoroan hotu-hotu ne’ebé mak prienxe kritériu, nia iha direitu tomak atu liu iha vaga refere,” nia informa.
Antes ne’e, Diretor Servisu Apoiu Diagnóstiku Terapeutiku iha HNGV, Vidal de Jesus Lopes, informa Hospitál Nasionál Guido Valadares (HNGV) sei publika vaga 400-resin ba profisionál saúde.
Kona-ba prosesu rekrutamentu sei anúnsia ba públiku, tanba rekrutamentu esforsu husi Hospitál Nasionál Guido Valadares atu reforsa rekursu umanu no hadi’a kualidade servisu saúde ba komunidade.
“Atu informa ba públiku katak ospitál nasionál prevee orsamentu ba rekrutamentu ba tinan ida-ne’e, rekrutamentu ba funsionáriu sira-ne’e kompostu husi médiku, parteira, infermeiru, tékniku aliadu no asisténsia enfermeiru maibé orsamentu ba rekrutamentu. Ha’u labele mensiona enprinsipiu ami prevee ona no semana oin sei publika, nune’e aplikante sira mai konkore,” Vidal de Jesus Lope, haktuir.
Nia haktuir, prosesu rekrutamentu ne’e mai husi Hospitál Nasionál Guido Valadares, Ministériu Saúde no mós Komisaun Funsaun Públiku.
“Prosesu administrativu entre HNGV, MS ho KFP. Tentativa semana oin ami sei taka sai vaga rekrutamentu ba públiku, nune’e aplikante sira mai konkore ba vaga refere,” nia hateten.
Informasaun ne’ebé disponivél, detallu kona-ba kategoria vaga ka kritériu kandidatura, dokumentus ne’ebé presiza, tuir prazu entrega no prosedimentu selesaun sei hatudu iha anúnsiu ofisiál bainhira vaga sira publika.
“HNGV hein katak oportunidade rekrutamentu ne’e bele fó espasu ba ema barak, liuliu ba profisionál no kandidatu sira-ne’ebé iha kualifikasaun atu kontribui ba servisu saúde nasional. Tanba ne’e, husu kandidatu sira-ne’ebé iha interese tenke akompaña komunikasaun ofisiál HNGV atu hetan informasaun kompletu kona-ba vaga 400-resin ne’e no evita depende ba informasaun ne’ebé la’ós fonte ofisiál,” nia dehan.
Jornalista : Felicidade Ximenes
Editór : Cancio Ximenes
