Faze dahuluk, Autoridade RAEOA notifika uma tolu iha Palaban atu hamamuk fatin

OEKUSI, 21 Setembru  2026 (TATOLI) –   Autoridade Rejiaun Administrativa Espesiál Oekusi Ambeno (RAEOA), liuhusi Servisu Rejionál Terra no Propriedade, halo ona identifikasaun ba uma-kain tolu iha bairru Palaban no uma-kain ida iha bairru Santa-Roza perténsia suku Costa nian atu hamamuk ona fatin, tanba Autoridade sei konstrui edifísiu ba instituisaun Estadu nian husi Governu Sentrál nian.

Diretór Servisu Rejionál Terra no Propriedade Oekusi, José Ase Neno Colo, hateten, identifikasaun ne’e nu’udar faze dahuluk, faze tuirmai sei kontinua notifika tanba abitante sira-ne’ebé okupa rai Estadu iha área Kiumaria no Palaban to’o Aeroportu Rota do Sandalo nia rohan atu hamamuk ona fatin.

Tanba objetivu husi identifikasaun ne’e atu fó notifikasaun ba sira-ne’ebé hela iha rai Estadu, konsidera afetadu, no tenke preparaan hodi buka ona fatin.

“Semana kotuk, ekipa bens no moveis Estadu ba identifika ona fatin, uma no rai Estadu iha suku Costa, uma-kain tolu iha área Palaban no uma-kain ida iha Santa-Roza. Objetivu husi identifikasaun ne’e atu fó notifikasaun ba sira hodi hamamuk ona fatin, tanba fatin sira-ne’e identifikadu atribuisaun ba instituisaun Estadu balun atu instala sira-nia edifisíu iha Oekusi,” nia hateten ba jornalista sira iha Oekusi, ohin.

Notísia relevante:SEATOU alerta ba abitante Kiumaria no Palaban iha Oekusi hahú buka fatin

Ezekutivu ne’e dehan katak daudaun ne’e parte Autoridade RAEOA liuhusi servisu Terra Propriedade koordena ona ho instituisaun sira-ne’e, no uma-kain tolu iha Palaban ida iha Santa-Kruz konsidera nu’udar afetadu.

“Ida-ne’e mós hetan orientasaun husi Prezidente Autoridade RAEOA, ne’e maka semana kotuk ita ba halo identifikasaun, hodi informa ba uma-kain haat ne’e atu prepara ona hodi buka fatin, tanba rai ne’e Estadu nian, só uma sira-ne’e maka komunidade nian, entaun voluntáriamente sira tenke hamamuk ona fatin,” nia hateten.

Autoridade ne’e hateten, molok atribui notifikasaun, parte terra propriedade sei halo uluk enkontru komunitária aberta ho komunidade afetadu uma-kain haat ne’e, ba prosesu indemnizasaun nian, ne’ebé Autoridade sei konsidera de’it ai-horis ne’ebé kuda ona inklui uma, enkuantu kona-ba rai sei laiha indemnizasaun.

“Se bainhira laiha kooperasaun husi komunidade afetadu uma-kain haat ne’e, maka Autoridade RAEOA iha kompeténsia hodi atribui notifikasaun tuir lei númeru 1/2003, hodi notifika durante loron 30, kuandu la kumpre nafatin, sei notifika tan ba loron 10, nafatin lakohi koopera maka solusaun ikus halo despezu administrativu obrigatóriu tenke hamamuk ona fatin,” nia afirma.

Notísia relevante:RAEOA ezekuta despezu administrativu ba uma-kain haat iha Merkadu Numbei

Xefe Suku Costa, Francisco Colo, kompromete sei koopera atu kontribui ba prosesu dezenvolvimentu importante promove dialogu aberta ho komunidade afetadu sira hodi intende malu.

“Se ida-ne’e tama ba servisu Autoridade nian liga ho rai no obra ne’ebé maka ita utiliza hodi okupa halo ba atividade privadu ka pesoál ou organizasaun ruma, konserteza ita tenke define hodi kolabora no koopera tanba fatin hirak-ne’e sai patrimóniu Estadu ninian, entaun nu’udar povu ita tenke kontribui ba dezenvolvimentu ne’ebé maka Autoridade RAEOA liuhusi servisu terra propriedade hodi halo obra ba nesesidade Estadu nian, ne’ebé ha’u nu’udar xefe suku tenke koopera, importante diálogu ho komunidade afetadu sira atu esplika didi’ak ba hodi komprende,” nia hateten.

Notísia relevante:Abitante 156 iha merkadu Numbei koopera ho Governu sobu rasik uma-kioske

Rekorde fali fali, antes ne’e, Autoridade RAEOA liuhusi Servisu Rejionál Terra no Propriedade halo despezu administrativu ba uma-kain haat, ne’ebé kontinua okupa iha áreadór merkadu Numbei hodi hamamuk fatin tanba Governu sei halo reabilitasaun ba merkadu tradisionál Numbei.

Antes ne’e, Sekretáriu Estadu Asuntu Toponímia no Organizasaun Urbana (SEATOU), lideradu Germanu Santa Brites, fó sai xamada atensaun ba abitante sira ne’ebé okupa rai Estadu iha bairru Kiumaria ba to’o Palaban no Aeroportu Rota do Sandalu nia rohan atu komesa ona buka fatin, tanba Governu sei utiliza fatin sira-ne’e ba obra dezenvolvimentu nasaun nian.

Jornalista: Abílio Elo Nini

Editór: Rafael Ximenes de A. Belo