RAEOA ezekuta despezu administrativu ba uma-kain haat iha Merkadu Numbei

OEKUSI, 20 Jullu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), segunda ohin, halo ona despezu adminitrativu, hodi hasai uma-kain haat, ne’ebé kontinua okupa arredór merkadu Numbei.

Sekretáriu Rejionál ba Asuntu Planeiamentu, Francisco Loka, klarifika katak desizaun Autoridade hasai obrigatóriu okupante uma-kain haat, tanba Governu atu halo konstrusaun foun ba merkadu tradisionál Numbei nian.

“Governu hakarak aselera dezenvolvimentu, bazeia ba ida-ne’e, Autoridade deliberasaun ida ho númeru 1/2026, loron 16 fulan Jullu, hodi orienta okupante uma-kain haat atu hamamuk fatin ida ne’e, tan ne’e iha sesta semana kotuk autoridade deside, ba ohin sira tenki husik ona fatin ne’e, hodi fó oportunidade ba Governu atu halo konstrusaun foun ba merkadu referidu,” nia hateten ba jornalista sira iha merkadu Numbei, ohin.

Notísia relevante:Prazu loron 30 ba uma-kain haat iha merkadu Numbei hamamuk fatin

Nia esplika, meiu ne’ebé Autoridade deside halo ho fazeadamente. Governu sempre mai halo aprosimasaun no diálogu aberta ho okupante sira, depois atribui notifikasaun ho prazu loron tolu antes ona, maibé okupante sira lakohi koopera. Tan ne’e, Governu tenke hasai obrigatoriamente.

Sekretáriu Rejionál ne’e informa katak, kona-ba direitu okupante sira-nian, Governu konsidera nafatin tanba antes ne’e ekipa konjunta husi Obra Públika, Diresaun Agrikultura, no Diresaun Terra Propriedade mai halo ona levantamentu dadus rekolla nian ba kada uma-kain, hanesan plantasaun, rai, no uma.

“Tuir lei deside ona katak, ba  rai sei selu kada metru-kuadradu dollár $5, kona-ba uma sei selu bazeia konstrusaun tuir kalkulasaun tékniku nian, no plantasaun sei selu bazeia ba  nia folin merkadória no dezisaun kolletivu husi Autoridade RAEOA,” nia hateten.

Notísia relevante:SEATOU apela ba uma-kain haat iha merkadu Numbei atu hamamuk ona fatin

Gaspar Elo, nu’udar okupante, sira-nia parte, hateten katak sira prontu koopera maibé rekomenda ba Governu presiza halo indemnizasaun ne’ebé justu ba patrimóniu ne’ebé iha.

“Ami uma-kain haat koopera la’ós ami maka lakohi, maibé ami preokupa tanba Governu seidauk halo indemnizasaun ba ami nia sasán sira, hanesan rai no plantasaun ami seidauk rona klaru inklui ami-nia rezidénsia sira, ne’ebé ami husu tenki respeita ami-nia direitu, labele duni de’it ami, tenki halo pagamentu uluk maka ami foin sai, ita nafatin respeita desizaun Governu maibé Governu mós tenki konsidera ami nu’udar sidadun timoroan atu hela iha rai pedasuk ida,” nia rekomenta.

Notísia relevante:Merkadu Numbei sei konstrui ho verba rihun $76, aterru hahú daudaun ona

Observasaun jornalista Ajénsia TATOLI,I.P, observa, iha despezu administrativu ne’e, hetan akompañamentu husi Polísia Nasionál Timor-Leste (PNTL) no Provedória Direitu Umanu no Justisa (PDHJ).

Rekorde fali katak, iha loron 24 Marsu 2025, ekipa konjunta liderada hosi SEATOU fó ona xamada atensaun ba vendedór sira-neʼebé halo uma no hela permanente iha merkadu Numbei hamutuk uma-kain 156, no koopera duni hodi hamamuk fatin atu hamamuk ona fatin iha fulan ida nia laran, maibé uma-kain haat de’it mak kontinua hela to’o ohin loron.

Notísia relevante:Ohin, SEATOU la konsege halo despezu administrativu ba kafetária “Manhoso” iha Jardín Oébau

Jornalista: Abílio Elo Nini

Editór: Rafael Ximenes de A. Belo