OEKUSI, 05 Dezembru 2025 (TATOLI) – Sekretáriu Estadu Asuntu Toponímia Organizasaun Urbana (SEATOU), Germano Santa Brites, lamenta ho desizaun Prezidente Autoridade iha Rejiaun Administrativa Espesiál Oekusi Ambeno (RAEOA), Régio da Cruz Salu, tanba la autoriza ekipa SEATOU hodi halo despezu administrativu kafetária O Manhoso ne’ebé lokaliza iha jardín Monumentu Koreanu Oébau.
Tuir Germano Santa Brites, antes ne’e, SEATOU fó ona tempu fulan tolu ho karta notifikasaun ba kafetária O monhoso atu atu hamamuk fatin, tanba Jardín Koreanu nu’udar fatin púbiku no fatin istória ba forsa Koreanu na’in-lima ne’eb’e mate iha Oekusi.
“Sira husu nafatin tempu, ita mai tiha ona kuaze tinan ida ona, ita mós fó hatene ona, notifikasaun tuun ona mós, ohin ha’u mai atu serbisu maibé sei hakarak husu tan tempu, entaun serbisu ida-ne’e husik ba Prezidente Autoridade ho nia estrutura mak halo, ha’u halo fali serbisu seluk iha Dili, tanba iha Dili mós presiza hela SEATOU atu halo serbisu, ne’ebé husik ba, iha tempu seluk mak ita ajuda malu,” nia dehan iha Jardín Koreanu Oébau, ohin.
Notísia relevante:SEATOU fó prazu ba kafetária iha Jardin Koreanu Oébau hamamuk fatin
Governante ne’e, afirma, ajenda atu halo despeju administrativu iha Oekusi la’ós planu mai husi SEATOU, maibé Prezidente Autoridade RAEOA ho nia estrutura mak konvida direita SEATOU iha momentu debate Orsamentu Jerál Estadu (OJE) 2026 nian iha Parlamentu Nasionál, mak konvida atu halo intervensaun iha Oekusi.
“Maibé konforme, Prezidente dehan jadi sobu ka la’e, ha’u ba Dili agora, atu halo serbisu fali iha Dili no kontinua tan ba buat seluk. Ha’u lahatene, nia serbisu hamutuk ho ha’u ka la’e, maibé nia (PA) mak konvida ha’u mai, ajenda mós konfirmadu ona, antes debate OJE mak ha’u mai, ne’e mak ohin mai, maibé ha’u mai tempu hanesan ne’e, ne’ebé Prezidente Autoridade ho nia estrutura mak halo serbisu ba, ha’u kontinua fali serbisu fali ba buat seluk,” nia lamenta.
Notísia relevante:Okupa espasu públiku, SEATOU sobu barraka 35 iha Oekusi
Hatan ba asuntu ne’e, Prezidente Autoridade RAEOA, Régio da Cruz Salu, rejeita la’ós atu impede maibé husu atu aumenta tempu ba kafetária na’in, maibé nu’udar Prezidente Autoridade apoia serbisu SEATOU atu halo despezu administrativu tanba kafetária ne’e okupadu fatin públiku.
“Tuir loloos ohin ezekuta atu sobu, maibé iha razaun, kafetária na’in ohin ba iha Gabinete Primeiru-Ministru iha Dili, dehan labele hein lai fó fali tempu, ne’e mak ha’u telefoni fali mai, dehan bele ka la’e fó fali tempu seluk. Ha’u la impede, defaktu tenke sai, tenke hamamuk fatin ne’ebá, maibé ita-nia maluk sira ohin ba hasoru entidade tuteladu iha Dili maibé la konsege, entaun telefone tama mai ha’u, entaun ha’u hato’o informasaun ne’e ba Diretór Administrasaun maibé la responde tanba tuur hela iha oin, entaun ha’u haruka Gabinete ida ba ko’alia ho SEATOU, ne’ebé to’o agora ha’u seidauk hetan konfirmasaun bele ka labele, maibé ha’u-nia pozisaun tenke sai husi fatin ne’e, atu ita hadi’a didi’ak jardin ne’e, ne’ebé ha’u la impede,” nia hateten.
Notísia relevante:SEATOU alerta ba abitante Kiumaria no Palaban iha Oekusi hahú buka fatin
Tuir observasaun Jornalista Ajénsi Tatoli,I.P, observa, hafoin kansela atu halo despezu administrativu ba kafetária O manhoso, Sekretáriu Estadu Asuntu Toponímia Organizasaun Urbana (SEATOU), Germano Santa Brites, orienta kedas ekipa hodi viajén kedas ba Dili iha oras tuku 15:00 lorokraik liuhusi transporte Terrestre fronteira Sakato-Wini.
Entretantu, monumentu Jardin Koreanu ne’e, nu’udar omenajen ida ba Militar Koreanu naʼin-lima neʼebé mate iha Oekusi hanesan Letnan Kolonel Byungjo Min, Letnan Kolonel Jin Kyu Park, Sarjentu Jong Hoon Baek, Sarjentu Jeong Joong Kim, Sarjentu Hee Choi bainhira hala’o misaun pás liuhusi ONU. Koreanu sira ne’e husi “Evergreen”. Trajedia ne’e akontese iha mota Noel-Ekat, suku Bobometo, sub-rejiaun Oésilo, tanba dezastre naturál-udan bo’ot no korrente mota neʼebé maka’as.
Jornalista: Abílio Elo Nini
Editór: Rafael Ximenes de A. Belo
