OEKUSI, 17 Novembru 2025 (TATOLI) – Empreza Colneno Unipesoál Lda, segunda ohin hahú halo aterru ba merkadu tradisionál Numbei ho verba rihun $76,000,00, ne’ebé lokaliza iha aldeia Sanane suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Prezidente Autoridade RAEOA informa, projetu ne’e la’ós ajudikasaun direita ka projetu emerjénsia maibé liuhusi konkursu públiku, tanba merkadu referidu kategória nesesáriu ne’ebé eziste iha vila laran.
“Iha tempu-badak ita sei halo lansamentu ba konstrusaun, tanba foin daudaun ne’e Governu hasai komunidade sira ho obrigatóriu depois atu husik de’it merkadu hanesan ne’e, ne’ebé SEATOU sei mai, ita lansa iha ínisiu Dezembru, fulan oin. Agora kompañia hahú uluk halo aterru atu prepara ba konstrusaun,” nia hateten ba jornalista sira iha Oekusi, ohin.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
Diretór empreza Colneno Unipesoál Lda, Marcos Colo, promete sei kumpre dokumentu kontratu ho périodu fulan neen tenke finaliza.
“Ita hahú iha semana kotuk hafoin ita simu orden serbisu, tanba ami tenke implementa iha tempu fulan neen nia laran, ne’ebé ita nia materiál sufisiente atu garante projetu ne’e tuir rekomendasaun Governu nian,” nia kompromete iha merkadu Numbei, ohin.
Notísia relevante:Abitante na’in-154 iha merkadu Numbei koopera ho SEATOU sobu rasik sira-nia uma
Antes ne’e, Jestór Merkadu Numbei, Jestór merkadu Numbei, Fernando de Sousa, dehan, nu’udar vendedór ne’ebé hela dezde 2005.
Nia rekomenda ba Governu liuliu Autoridade RAEOA no SEATOU, atu konsidera patrimóniu sira-neʼebé komunidade sira konstrui ona hanesan uma, ai-oan no seluktan atu fó indemnizasaun.
“Ami apresia ho planu Governu atu halo dezenvolvimentu. Ami apoia atu hadi’a fatin ne’e sai di’ak, tanba ita observa nia kondisaun ladun di’ak – balun fa’an no la fa’an mós hela hotu iha ne’e, entaun imajen ladun di’ak, tan ne’e mak ami hot-hotu konkorda hodi koopera, di’akliu ami sobu rasik duke Governu mai lori eskavatór estraga tiha kaleng (zinku), ai no ba jaringan (rede) agora ita rasik haree, ema barak sai ona ba buka fatin atu hela, importante labele haluha presiza konsidera uma no plantasaun sira-neʼebé sei estragu,” nia orgullu.
Notísia relevante:Uma-kain haat iha merkadu Numbei rejeita hamamuk fatin tanba rai privadu
Entretantu, observasaun jornalista Ajénsia Tatoli,IP, observa, hafoin kompañia halo aterru, negosiante sira koopera hodi hamamuk fatin no muda ona ba merkadu provizória ne’ebé lokaliza iha Lagoa-ninin besik los ho merkadu tradisionál Numbei.
Jornalista: Abílio Elo Nini
Editór: Rafael Ximenes de A. Belo
