Abitante aldeia tolu iha Suku Loi-Ulu Vikeke enfrenta falta bee-moos
VIKEKE, 26 Setembru 2026 (TATOLI)–Xefe Suku Loi-Olu, Postu Uatukarbau, Munisípiu Vikeke, Celestinho de Fatima Monteiro, informa, durante ne’e abitante aldeia tolu husi Suku Loi-Ulu enfrenta falta bee-moos.
“Durante ne’e, ami-nia komunidade aldeia tolu preokupa loos ba bee-moos, atu asesu ba bee tenke bá fali bee-matan antigu Uailara mak foin kuru hodi responde ba nesesidade loron-loron. Maibé, ho distánsia to’o kilometru ida ka rua foin to’o iha bee-matan,” Celestinho de Fatima Monteiro hato’o ba Ajénsia TATOLI, iha Suku Loi-Ulu, Sábadu ne’e.
Autoridade komunitária ne’e hatutan, instalasaun ba bee-moos iha suku ne’e iha, maibé tanba tempu bailoro, bee labele to’o iha komunidade.
“Ami iha fasilidade kanu bee-moos to’o iha aldeia tolu, maibé débitu bee nian mak la forsa, entaun bee labele to’o iha aldeia tolu. Nune’e, daudaun ne’e komunidade aldeia rua de’it mak asesu,” nia hato’o.
Notísia relevante : BTL halo ona melloramentu sistema bee-moos ba uma kain 83.204
Autoridade Suku Loi-Ulu hato’o ona preokupasaun ne’e ba Postu Uatukarbau no Munisípiu Vikeke maibé seidauk iha resposta.
“Preokupasaun ne’e ha’u aprezenta ona ba postu no parte relevate sira iha munisípiu atu instala grupu jestaun bee-moos ida iha ami-nia suku hodi kontrola para komunidade bele asesu ba bee-moos,” Celestino akresenta.
Suku Loiu-Ulu iha aldeia lima, aldeia tolu ne’ebé la sesu bee mak hanesan Aldeia Deni Hare ho uma-kain 31, populasaun 176, Aldeia Lau-Aba ho uma-kain 39, populasaun 197, Aldeia Assfada’e ho uma-kain 61, populasaun 274, enkuantu suku rua ne’ebé asesu bee-moos mak hanesan Aldeia Builale ho uma-kain 56, populasaun 251, Aldeia Lia-Buta ho uma-kain 53, populasaun 258.
Jornalista : Vitorino Lopes da Costa
Editora : Julia Chatarina
