ANLA ezekuta ona 30% husi OJE 2026
DILI, 26 Setembru 2026 (TATOLI)–Autoridade Nasionál Lisensiamentu Ambientál, Insitutu Públiku (ANLA, I.P) iha trimestre datoluk ne’e, ezekuta ona 30% husi Orsamentu Jerál Estadu (OJE) 2026 ho totál estimasaun orsamentu $29.542 husi totál alokasaun $127.606.
“Alokasaun fahe ba katagoria saláriu no vensimentu no bens no serbisu, ne’ebé ba atividade hanesan survei, monitorizasaun no sensibilizasaun dekretu-lei no lisensiamentu ambientál ba públiku,” Diretór ANLA, I.P, Gilberto Correia Soares informa ba Ajénsia TATOLI iha nia knaar fatin, Akait, foin lalais ne’e.
Notísia relevante : ANLA ezekuta ona 25% OJE 2026 iha trimestre dahuluk
Nia dehan, durante ezekusaun ne’e instituisaun enfrenta problema finanseira no rekursu umanu ne’ebé limitadu tanba instituisaun nia serbisu kobre área oioin hanesan indústria, manufatureira no seluk tan.
“Ne’ebé tinan oin mak ami sei aumenta tan osan ba OJE 2027 atu ajuda serbisu iha terrenu, liuliu sosializasaun no monitorizasaun,” nia akresenta.
Orsamentu alokadu ba tinan ne’e prevee ba atividade hanesan formasaun AIA $20.000 no emite lisensa $107.606, enkuantu kona-ba saláriu no vensimentu la inklui tamba orsamentu tutela ba Ministériu Turizmu no Ambiente (MTA).
Jornalista : Alexandra da Costa
Editora : Julia Chatarina
