HADER kapasita feto foinsa’e Bobonaru atu dezenvolve atividade produtiva
BOBONARU, 25 Setembru 2026 (TATOLI) – Fundasaun HADER hala’o programa kapasitasaun ba feto foinsa’e iha munisípiu Bobonaru, ho objetivu atu dezenvolve kapasidade lideransa, komunikasaun no kooperasaun, inklui motiva sira atu harii atividade produtiva iha komunidade.
Diretór-Ezekutivu HADER, Abel Mau Sari Perreira, hatete programa ne’e integra iha esforsu atu hametin reziliénsia sustentavel, liuhusi preparasaun no kapasitasaun komunidade, inklui grupu feto foinsa’e.
“Ita-nia atividade ida-ne’e atu ajuda liután ita, konfia ita-nia an hodi bele dezenvolve ita-nia lideransa, aprende komunikasaun no ko’alia iha públiku, depois harii ideia no atividade produtiva no aprende jestaun kona-ba oinsá harii organizasaun ka grupu”, nia informa, ohin.
Atividade ba feto foinsa’e ho idade entre 28 no 35 tinan ne’e hala’o ona enkontru ba datoluk atu oinsá orienta kona-ba uza sira-nia talentu no kapasidade atu fó kontribuisaun ba família no komunidade.
Programa ne’e mós buka atu loke hanoin feto foinsa’e sira kona-ba oportunidade atu dezenvolve kapasidade rasik, la depende de’it ba oportunidade servisu husi Governu.
Abel hateten, iha programa ne’e, HADER mós planeia atu loke oportunidade ba komunidade iha suku seluk, ho feto foinsa’e sira ne’ebé partisipa agora bele sai referénsia ba sira seluk.
“Daudaun ne’e ita sei foku ba foinsa’e sira iha Saburai. Sira nafatin mai tuir treinamentu iha ne’e, ita introdús tanba saida mak ita-boot sira remata eskola halimar de’it, ita-boot sira talentu ne’e oinsa bele uza, ita-boot sira karidade ba familia no komunidade iha ka la’e. Ita fasilita sira atu loke sira-nia hanoin no vontade”, nia dehan.
HADER mós prepara hela planu atu implementa programa ho naran Reziliénsia.
Aleinde programa ba feto foinsa’e, HADER hala’o mós atividade jestaun risku ba dezastre iha postu administrativu Bobonaru, liuliu iha suku Ilat-laun no Atuaben, no iha postu Kailaku, inklui suku Manapa, Gulolo, Genulai no Meligo.
Atividade ne’e foka ba fó informasaun no kapasitasaun ba komunidade kona-ba preparasaun no resposta bainhira akontese dezastre, liuliu iha tempu udan no bailoro, inklui oinsá responde ba nesesidade agrikultór sira.
HADER mós parseria ho WaterAid atu hala’o atividade fízika no la’ós fízika iha área bee no saneamentu. Atividade la’ós fíziku inklui fó treinamentu ba setór saúde no Grupu Maneja Fasilidade (GMF), enkuantu atividade fízika envolve reabilitasaun infraestrutura bee.
Iha muunisípiu Bobonaru, atividade fízik ne’e hala’o iha suku Bobonaru, postu Bobonaru, no iha suku Rairobo, postu Atabae, inklui reabilitasaun torneira públika ba komunidade.
Abel hatete programa hirak ne’e parte husi esforsu HADER atu hametin kapasidade komunidade no fó oportunidade ba sira atu dezenvolve lideransa, atividade produtiva no reziliénsia hasoru dezastre.
Jornalista: Sergio da Cruz
Editora: Maria Auxiliadora
