Prezidente RAEOA apresia TATOLI,I.P deside Oekusi ba diálogu Fraternidade Umana
OEKUSI, 25 setembru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, apresia ho inisiativa Ajénsia notisioza Timor-Leste, TATOLI,I.P hodi deside Oekusi implementa diálogu Fraternidade Umana, ne’ebé ho oradór sira mak hAsesór Fraternidade Umana, iha Prezidénsia Repúblika, Nuno Guilherme Horta Assis, Prezidente RAEOA rasik, Administradór Timor Tengah Utara (TTU), Yosep Falentinus Delasallu Kebo – bainaka onra, reprezentante amu Paróku, inklui Profesora EBC Palaban, Maria Quelo.
“Ha’u haraik-an no agradese ba Xefe Estadu RDTL, liuhusi Gabinete Fraternidade Umana, ne’ebé ho laran-kma’an bele hili Oekusi sai primeiru munisipíu hala’o diálogu Fraternidade Umana. Ohin ita atu ko’alia kona-ba arti dan bijaknya kesetia kawanan,” nia hateten iha abertura diálogu implementasaun Fraternidade Umana, ne’ebé hala’o iha salaun konvensaun Palaban, ohin.
Autoridade másimu Oekusi, felista mós ekipa mídia Estatál Ajénsia Noticioza Timor-Leste, Institutu Públiku (Tatoli,I.P), tanba ho esforsa tomak hodi koordena atutoridade RAEOA, nune’e bele realiza diálogu implementasaun Fraternidade Umana iha Oekusi.
“Ami-nia agradese espesiál ba Tatoli,I.P, ne’ebé tinan kotuk to’o tinan ne’e, la kolen mai ko’alia ho Autoridade RAEOA atu simu netik diálogu ida-ne’e, hanesan valór ida ba ita-nia povu tomak, ema timor, no ohin ita realiza, obrigadu no ami respeita ba ita-boot sira,” nia orgullu.
Valór kona-ba Fraternidade Umana, tuir Régio da Cruz, espiritu ne’ebé Prezidente Repúblika kuda ema hothotu no ba nasaun Timor-Leste no Repúblika Indonézia atu foku, tanba diálogu ne’ebé hala’o dahuluk iha Oekusi hothotu tau atensaun tanba diálogu ne’e ko’alia ba malu hanesan ema (Atoni); nekaf mese-ansaof mese – neon ida, laran ida, timor ba valór fraternidade umana.
“Primeira-vés hala’o iha Oekusi, tenkisér sai memória ida di’ak, tanba Timor-Leste hanesan nasaun ida iha mundu, adota uluk valorés fraternidade umana, ohin mezmu ita-nia Prezidente Repúblika la marka prezensa fíziku, maibé nia espiritu no objetivu ba ita, atu tane valór timoroan la sura ita ema Timor-Leste no Timor Osidentál maibé ita ko’alia kona-ba Timor ba rai no povu, ita tenke hatuur iha fatin ne’ebé dignu, ohin ita ho ita ko’alia ba malu nu’udar maun no alin,” nia hateten.
Notísia relevante:Tatoli Hakbesik iha RAEOA sei destaka implementasaun Fraternidade Umana
Iha biban ne’e, Prezidente Ajénsia TATOLI, I.P, Noemio Falcão, informa diálogu ne’e ho tema implementasaun Fraternidade Umana, ne’ebé importante tebes liliu komunidade sira iha liña fronteira Timor-Leste ho Indonézia. Tanba fronteira la’ós de’it fatin ne’ebé fahe territóriu, maibé bele mós sai ponte ida-ne’ebé liga povu, kultura, família no relasaun entre nasaun rua nian.
Lideransa mídia estatál ne’e, afirma katak Ajénsia TATOLI,I.P, nu’udar kanál ofisiál Estadu nian, halo kolaborasaun di’ak tebes ho Autoridade RAEOA, hamutuk ho Gabinete Prezidente Repúblika liliu Gabinete Fraternidade Umana, hodi realiza programa ida-ne’e ba ema hotu, atu rona, liuhusi oradór na’in-lima ne’ebé iha disponibilidade atu ba ajenda ne’e.
“TATOLI,I.P nu’udar mídia Estadu públiku nian, iha responsabilidade atu kontribui ba sosiedade liuhusi informasaun ne’ebé loos, kredivél, edukativu no promove diálogu. Liuhusi Programa Tatoli Hakbesik, ami hala’o ona edisaun primeiru iha munisipíu Ainaro no ohin edisaun daruak iha Oekusi,” nia informa.
Tanba ne’e, nia dehan, liuhusi diálogu ba implementasaun Fraternidade Umana iha Timor-Leste, espera katak intervensaun sira husi oradór prinsipál na’in-lima, bele ajuda ona públiku atu komprende liu tan kona-ba polítika no prátika Fraternidade Umana iha komunidade fronteira. Dezafíu sira-ne’ebé durante ne’e enfrenta no oportunidade sira hotu atu hametin kooperasaun entre Timor-Leste ho Indonézia hanesan nasaun maun-alin.
“Ikusliu, ha’u konvida ita hotu, partisipa ho laran-luak iha diálogu ne’e, hodi hametin dame, amizade no Fraternidade Umana,” nia afirma.
Diálogu Fraternidade Umana
Atividade Diálogu Fraternidade Umana nu’udar inisiativa ida husi TATOLI,I.P, ne’ebé hala’o ho objetivu atu hametin konfiansa entre povu no Estadu, promove pás, diplomásia no defende direitu ema hotu, inklui solidariedade, toleránsia, no unidade iha diversidade.
Rezultadu esperadu (Outcomes) husi atividade ne’e mak:
- Hametin relasaun Estadu ho povu. Fó espasu atu kria konfiansa, solidariedade, no fraternidade umana.
- Valoriza diversidade kulturál no sosiál RAEOA. Programa ne’e fó espasu atu fó apresiasaun ba kultura no identidade komunidade hanesan parte esensiál ba unidade nasionál.
Notísia relevante:Papa Francisco nu’udar aman ba fraternidade umana
Jornalista: Abílio Elo Nini
Editór: Rafael Ximenes de A. Belo
