OEKUSI, 11 Juñu 2026 (TATOLI) – Ekipa husi Ajénsia Noticioza Timor-Leste, Institutu Públiku (TATOLI,I.P) hamutuk ho ekipa Fraternidade Umana husi Palásiu Prezidente Repúblika, kinta ohin, hala’o enkontru daruak ho Autoridade Rejiaun Administrativa Espesiál Oekusi Ambeno (RAEOA) kona-ba realizasaun Programa Tatoli Hakbesik, ne’ebé sei realiza iha loron 26 Juñu 2026 ho oradór prinsipál maka Prezidente Repúblika José Ramos Horta sei ko’alia kona-ba Fraternidade umana.
Notísia relevante:TATOLI,I.P koordena ho autoridade RAEOA hodi realiza Programa “Tatoli Hakbesik” iha Oekusi
Vise Prezidente ba Asuntu Administrasaun no Finansa, Madalena Pereira Carlos, informa, programa Tatoli hakbesik ba iha munisípiu, nu’udar programa prioridade husi mídia estatál TATOLI,I.P, ne’ebé antes ne’e realiza ona iha Postu Administrativu Maubise, Munisípiu Ainro iha tinan-2025 ho oradór prinsipál maka Prezidente Repúblika, José Ramos Horta.
“Iha fulan-Marsu 2026 ne’e, ami mai hasoru ona Prezidente Autoridade, tanba sei konvida Prezidente Repúblika atu mai ho Programa Tatoli Hakbesik iha Oekusi, ne’ebé iha semana kotuk, Prezidente Reppúblika deside ona katak, iha loron 25 Junu agora sei viajén mai Oekusi no 26 Jullu halo diÁlogu tuir programa Tatoli Hakbesik ninian,” nia hateten ba jornalista iha Salaun Gabinete RAEOA, ohin.
Tanba ne’e, membru Konsellu Diretivu ne’e akresenta katak ekipa TATOLI,I.P ho Gabinete Prezidente Repúblika liuhusi Fraternidade Umanu, mai koordena ho Autoridade RAEOA, tanba Prezidente Repúblika mai Oekusi, sei fokuliu ba fraternidade umana.
“Prezidente Repúblika sei mai to’o iha loron 25 Jullu 2026 ne’e, ne’ebé ohin mai ne’e ba preprasaun téknika ba parte tolu, RAEOA hanesan uma-na’in, Fraternidade Umana maka sei lori Prezidente Repúblika mai no TATOLI,I.P hanesan Programa ba Tatoli Hakbesik, hodi prepara nia programa sira durante estadia iha Oekusi,” nia énfaze.
Notísia relevante:Tinan ne’e, hahú implementa Disiplina Fraternidade Umana iha ensinu báziku
Iha fatin hanesan, Sekretáriu Rejionál ba Asuntu Administrasaun no Finansa, Salvador da Cruz, ne’ebé reprezenta Prezidente Autoridade RAEOA, kompromete katak sei garante preparasaun ba atividade prinsipál tolu ho másima.
Primeiru, preparasaun simu Prezidente Repúblika mai Oekusi, daruak konvida maluk sira husi nasaun viziña, hanesan Timur Tengah Utara (TTU), Timor Osidentál inklui Kupang, no datoluk koordena ho autoridade lokál, relijioza inklui entidade relevante sira iha Oekusi atu asiste direita programa Tatoli Hakbesik ne’e.
“Programa ne’e mós relasaun ho maluk timoroan sira sei iha sorin, sei konvida atu partisipa ne’e maka importante ba ita, nune’e bele kria relasaun di’ak ho maluk sira no parte rai laran maka sei konvida Konsellu-Suku sira, partidu polítika sira, relijioza sosiedade sívil inklui komunidade sira, ita sei konvida hotu atu partisipa másima tanba ne’e importánsia hodi hatene kona-ba fraternidade umana ne’e,” nia hateten.
Entretantu, implementasaun Programa Tatoli Hakbesik iha RAEOA ne’e nia objetivu mak hametin konfiansa entre povu no Estadu, promove pás, diplomásia no defende direitu ema hotu. No, Rezultadu esperadu husi programa referidu iha RAEOA ne’e mak hametin relasaun Estadu ho povu, fó espasu atu kria konfiansa, solidariedade, no fraternidade umana, inklui valoriza diversidade kulturál no sosiál RAEOA. Programa ne’e fó espasu atu fó apresiasaun ba kultura no identidade komunidade hanesan parte esensiál ba unidade nasionál.
Notísia relevante:Ramos-Horta partisipa forum anuál prémiu Zayed Fraternidade Umana iha Abu Dhabi
Jornalista: Abílio Elo Nini
Editór: Rafael Ximenes de A. Belo
