OEKUSI, 13 Marsu 2026 (TATOLI) – Ajénsia Notisioza Timor-Leste, TATOLI,I.P, sesta ne’e, koordena ho Autoridade Rejiaun Administrativa Espesiál Oekusi-Ambeno (RAEOA) hodi realiza Programa “Tatoli Hakbesik” iha Oekusi, tuir planu no programa determinadu.
TATOLI,I.P reprezenta husi Vise Administrasaun no Finansa, Madalena Pereira Carlos, akompaña ho Xefe Departamentu Administrasaun, Finansa no Planeimentu, Alexandrina B. da C. Soares, inklui Xefe Depertamentu Multimídia, Florêncio Miranda Ximenes, hodi aprenzenta konseitu Programa Tatoli Hakbesik no mós aborda kestaun pertinente no relevante ho Prezidente autoridade RAEOA, Régio da Cruz Salu.
Notísia relevante:Autoridade Munisípiu Ainaru apresia programa Tatoli Hakbesik sai ponte Estadu ho Povu
Hafoin akompaña aprezentasaun konseitu Programa Tatoli hakbesik, ne’ebé aprezenta husi ekipa Tatoli, Prezidente Autoridade RAEOA konsidera importante tanba parte ida bele promove nia sivilizasaun.
“Ha’u kontente tanba primeiru enkontru no pedidu atu expos Oekusi atu akontese daudaun. Ha’u promete katak ha’u sei harii ekipa ida atu junta Tatoli nia ekipa atu prepara didi’ak,” nia hateten hafoin ramata enkontru iha salaun Gabinete Prezidente Autoridade Okeusi, ohin.
Programa ne’e rasik tuir Planu sei iha mós Diálogu entre Prezidente Repúblika José Ramos Horta ho tema “Ramos-Horta ho Povu” hamutuk ho komunidade sira hodi ko’alia kona-ba Implementasaun Fraternidade Umana.
“Ha’u nu’udar Prezidente Autoridade, agradese no husu atu organiza di’akliu. Ami sei tuir saida mak ita presiza prienxe, prepara didi’ak, tanba ida-ne’e nunka akontese iha fulan-lima kotuk, agora ne’e di’ak tebes atu expost Oekusi,” nia hateten hafoin remata enkontru iha salaun Gabinete Prezidente Autoridade Okeusi, ohin.
Hafoin observa, ekipa Tatoli.I.P observa konseitu liuhusi Power point, Prezidente Autoridade rekomenda, programa “Tatoli Hakbesik”, presiza realiza kada trimestrál, nune’e bele hakbesik Governu ba povu iha área rurál.
“Programa ida-ne’e tenkisér regulár kada fulan tolu; tenki realiza! Planu katak programa ne’e sei realiza iha fulan-Maiu. Maibé, ha’u hakarak huzu fulan-tolu tuir mai ne’e, bele kontinua ba tan serbisu setórál sira. Presiza expose nune’e públiku bele akompaña Oekusi, tanba dala-barak públiku dezafia Oekusi, dezafia ita-nia polítika no dezafia ita-nia desizaun (Public policy) ba lideransa kona-ba Oekusi, agora presiza expose Oekusi, nune’e bele akompaña no ajuda mós Oekusi,” nia rekomenda.
Notísia relevante:Agência TATOLI,I.P lansa tan programa foun rua
Vise- Prezidente Administrasaun no Finansa, Madalena Pereira Carlos, hanesan mós Responsavél Komisaun Organizadora, informa enkontru ne’e hanesan inísia atu diskute kona-ba estabelesimentu ekipa no preparasaun ekipa.
Tanba Programa Tatoli Hakbesik ne’e, nia alvu atu hala’o ba iha munisipíu sira, no programa ne’e lansa ona iha 2025, ne’ebé antes ne’e realiza ona iha Postu Administrativu Maubise, MunisípíuAinaru.
“Entaun iha tinan ne’e (2026) previlejiu boot tanba ami lori mai iha RAEOA, ne’e mak ohin koordena ho Prezidente Autoridade, ne’ebé ho antuziasmu tebes,” membru Konsellu Diretivu TATOLI ne’e hakatuir.
Nia adianta, vizita iha RAEOA ne’e hanesan vizita peskiza inisiál atu estabelese ekipa serbisu. No, iha ámbitu enkontru ne’e, autoridade mídia estatál ne’e haktuir katak PA REOA sei forma komisaun organizadora atu koordena ba malu ba preparasaun realiza Programa Tatoli Hakbesik.
Iha sorumutu ne’e TATOLI fó data tentativa no iha mós konkordánsia atu realiza iha loron 07-08 Maiu ne’e no husi ne’e sei informa fali ba Prezidente Repúblika tanba apoia tebes programa ida ne’e.
“Entaun espera katak ba oin Programa Hakbesik ne’e mai tuir konseitu ho vizaun ne’ebé Prezidente Autoridade iha, hodi fó vizibilidade liu ba rai ida-ne’e, tanba hodi tuir mai, ita-bele hatene katak husi programa ne’e bele dada konektidade programa sira hanesan istória, turizmu no seluktan,” nia konklui.
Jornalista: Abílio Elo Nini
Editór: Rafael Ximenes de A. Belo
