MTK kompromete harii torre reforsa liña telekomunikasaun iha Oekusi
OEKUSI, 09 Novembru 2026 (TATOLI) – Ministeiru Transporte no Komunikasaun (MTK), sei harii torre espesífika direta iha Rejiaun Administrativa Espesiál Oekusi Ambeno (RAEOA), hodi bele fasilita liña telekomunikasaun iha rejiaun ne’e.
MTK, Miguel Marques Gonçalves Manetelu informa, durante ne’e preokupasaun iha Oekusi pertinente tanba bainhira atu asesu internet no halo kontaktu, difikulta tebes, tantu operadór Telemor, Telkomsel, no Timor Telekom.
Tanba ne’e, nia dehan, Governu liuhusi polítika MTK iha ona planu, tempu besik sei harii torre ida iha Dili, hodi liga direita ba Oekusi, nune’e bele fasilita populasaun sira asesu informasaun liuhusi internet ho laís, hodi hein futuru instalasaun kabu submariñu
“Setór telekomunikasaun, iha ona planu atu asina kontratu hodi hari torre rua iha Dili, torre ida ligasaun ba Atauru ida seluk mai Oekusi atu fasilita internet iha Oekusi, aleinde planu seluk, Kabu Submariñu Timor-Leste, E.P ne’ebé agora iha diskusaun hela ho Indonézia, maibé ba kortu prazu, torre rua nee’ebé atu harii tenke realiza atu fasilita internet,” nia hateten iha aeroportu Oekusi foin lalais ne’e.
Notísia relevante:Uma-kain 300-resin iha Bene-Ufe Nítibe kontinua seidauk asesu liña telekomunikasaun
Prezidente Autoridade RAEOA, Régio da Cruz Salu, konsidera planu atu instala torre, importante tanba Oekusi enfrenta problema liña telekomunikasaun tantu kontaktu direita no asesu internet.
“Ita espera katak polítika ne’e presiza realiza tanba ne’e parte ida atu rezolve preokupasaun komunidade Oekusi nian, tanba iha fatin lima ka neen maka asesu telekomunikasaun susar tebes inkkui internet,” nia espera.
Notísia relevante:MTK no CTL, E.P lansa “try out” koneksaun fibra ótika ba liña Governu
Entretantu, dadus populasaun ne’ebé infrenta liña internet no telekomunikasaun maka sub-rejiaun Nítibe iha suku Bene-Ufe, sub-rejiaun Oésilo iha suku Usitasa’e no suku Bobometo, sub-rejiaun Pássabe maka iha suku Abani no Malelat inklui sub-rejiaun Pante Makasar iha suku Bobokase no suku Taiboko.
Jornalista: Abílio Elo Nini
Editór: Rafael Ximenes de A. Belo
