OEKUSI, 06 Outubru 2025 (TATOLI) – Komunidade uma-kain 334 iha aldeia Manán suku Bene-Ufe sub-rejiaun Nítibe, Rejiaun Administrativa Espesiál Oekusi Ambeno (RAEOA), kontinua preokupa tanba tinan barak ona seidauk asesu liña telekomunikasaun.
Tanba ne’e, Jestór sub-rejiaun Nítibe, Agustinho Afulit, rekomenda ba Autoridade RAEOA atu koordena no operadór telekomunikasaun sira atu rezolve kestaun ne’e.
“Ami iha aldeia Manán dezde seidauk ukun-aan, to’o ita ukun aan ona mós, rede telekomunikasaun to’o agora seidauk rezolve, tan ne’e prezudika ami, bainhira halo seremónia ofisiál ruma iha ne’e, difikulta ami atu komunika ho parte hotu. Asuntu ne’e, ha’u koordena direita ona ho Prezidente Autoridade, espera ba oin bele rezolve netik tanba família balun moras presiza ambulánsia maibé kontaktu oinsá, ami husu tenke rezolve tanba ne’e nesesáriu ba komunidade sira iha aldeia Manán,” nia hateten iha suku Bene-Ufe, foin lalais ne’e.
Notísia relevante:Populasaun aldeia Manan la asesu RTTL-liña telekomunikasaun
Iha fatin hanesan, Aigílio Toma’e, nu’udar profesór iha Eskola Bázika Filiál (EBF) Bitila, reforsa-taan katak, bainhira atu asesu referénsia ruma iha google susar tebes, tanba laiha rede internet, tantu Telemór, Telkomsel inklui Timor Telekom.
“Ami-nia problema mak rede telekomunikasaunde’it. Ami hanesan profesór bainhira atu asesu referénsia ruma iha google atu apoia labarik sira ho teknolojia susar tebes tanba rede laiha,” nia rekomenda.
Hatan ba rekomendasaun ne’e, Prezidente Autoridade RAEOA, Régio da Cruz Salu, promete sei koordena ho empreza telekomunikasaun sira, nune’e bele konsidera.
“Ha’u hatene fatin ne’e dezde uluk. STAE sira mai serbisu mós preokupa, instituisaun Estadu sira lubun ida konstrui iha aldeia Manán, entaun fó tempu ba rede telekomunikasaun sira husi Telemor, Telkomsel no Timortelekom atu konsidera. Ha’u sei koordena sira-nia sukursál sira Oekusi, karik la rezolve, Governu sei tama hodi instala Starlink, tanba ne’e importante ba komunidade sira,” nia promete.
Notísia relevante:Abitante Bene-Ufe husu PA RAEOA koloka ambulánsia multifunsaun
Jornalista: Abílio Elo Nini
Editór: Rafael Ximenes de A. Belo
