OÉ-CUSSE, 22 Jullu 2021 (TATOLI)—Populasaun iha aldeia Manan, suku Bene-Ufe, Sub-rejiaun Nítibe, kuaze uma kain 200-resin durante tinan barak la asesu liña telekomunikasaun no asesu informasaun liuhosi Radio Televizaun Timor-Leste (RTTL) no asesu internet.
“Ami iha aldeia Manan enfrenta problema rede Telemor no Timor-Telecom, kobre uma kain 200-resin mak la asesu ba rede telekomunikasaun nian. Aat liu mak ami la asesu informasaun no la nonton RTTL no internet,” Xefe Suku Bene-Ufe, Marcos Meni, hato’o preokupasaun ne’e iha serimónia inaugurasaun kuarentena iha aldeia Manan suku Bene-Ufe sub-rejiaun Nitibe, foin lalais ne’e.
Lidér lokál ne’e fundamenta, problema ne’e sira hato’o ona iha empreza Telemor no ikus mai hosi empreza konsege to’o iha baze halo identifikasaun iha tinan 2019 maibé to’o ohin loron seidauk iha solusaun.
“Ami lahatene kona-ba informasaun saida-de’it mak ita-nia nasaun halo hanesan ohin loron, saida mak nasionál halo. Tanba iha ne’e rede ba telefone lahetan. Apalagi televizaun no rádiu. Ita sente moris hanesan iha nakukun laran. Iha oportunidade ne’e, ha’u sujere ba parte relevante persiza fó atensaun ba ami-nia problema ne’e,” nia dehan.
Xefe Juventude suku Bene-Ufe, Agustinho Afulit, hateten komunidade sira iha suku refere aldeia Manan ne’e tinan barak susar tebes asesu ba liña telekomunikasaun no asesu ba rádiu no televizaun no internet.
“Problema rede laiha ne’e akontese dezde 2000 to’o agora. Bainhira atu telefone ba família ruma iha fatin dook susar tebes atu kontaktu. Asesu de’it informasaun hanesan RTTL no internet mós aat liután,” Agustinho Afulit informa.
Bainhira persiza atu kontaktu família iha fatin seluk, obrigatóriumente populasaun sira tenke la’o dook kuaze kilometru haat (4) mak foin hetan rede komunikasaun. Problema ne’e, tuir nia, sira levanta beibeik ona liuhosi mídia maibé seidauk iha resposta, tanba ne’e sujere ba parte relevante atu toma atensaun hodi responde sira-nia preokupasaun.
Hatán ba preokupasaun ne’e, Manajér Telemor RAEOA, Fransisco da Cunha, rekoñese katak empreza Telemor hala’o ona identifikasaun atu konstrui antena maibé tanba pandemia COVID-19 entaun antena ne’e sei konstrui iha tinan 2022.
“Ami halo ona survei iha fatin refere, ami sukat tiha ona fatin sira atu monta antena iha tinan 2020 maibé pandemia COVID-19 entaun planu ne’e ami pendente tiha,” nia dehan.
Totál populasaun iha suku Bene-ufe hamutuk 3.172, kompostu hosi aldeia Manan hamutuk 1.237, aldeia Lamasi hamutuk 757 no aldeia Citrana hamutuk 1.178.
Jornalista : Abilio Elo Nini
Editór : Cancio Ximenes
