Abitante Bene-Ufe husu PA RAEOA koloka ambulánsia multifunsaun
OEKUSI, 12 Maiu 2025 (TATOLI) – Abitante sira iha suku Bene-Ufe sub-rejiaun Nítibe rekomenda Rejiaun Administrativa Espesiál Oekusi Ambeno (RAEOA), husu atu koloka ambulánsia multifunsaun ba sentru saúde Baoknana hodi evakua pasiénsia sira ho situasaun emerjénsia husi postu saúde ba sentru saúde no Ospitál Referál Oekusi (HRO).
Abitante Francisco Jorge Carvallo, husi aldeia Citrana suku Bene-Ufe, informa, durante ne’e nia kontribui apoia karreta privada hodi tula pasiénte liliu partu iha postu saúde Manán suku Bene-Ufe hodi evakua mai sentru saúde Baoknana, tanba husi sentru saúde laiha karreta ambulánsia.
Notísia relevante:Uma-kain 100-resin iha suku Bene-Ufe Nítibe seidauk asesu liña eletrisidade
“Ha’u haree problema dala barak mosu mak bainhira atu komunika ba sentru saúde Baoknana bele haruka ambulánsia mai, depois ambulánsia Baoknana iha duni maibé lahatene oinsa mak karreta ne’e foun, mai la to’o tinan aat ona, durante ne’e ha’u mak ajuda barak ona, inan ferik balu partu sira telefoni mai ha’u, lori ha’u-nia karrera ba tula sira lori ba sentru saúde Baoknana atu hetan tratamentu, tan ne’e ha’u rekomenda ba autoridade RAEOA, seibele koloka transporte ida mai sentru saúde Baoknana,” nia dehan iha Oekusi.
Nia mós preokupa mós katak postu saúde Manán lokaliza iha suku Bene-Ufe, tinan barak ona la asesu ba rede telekomunikasaun hanesan Telemór, Timor- Telekom no TELEKOMCEL, nune’e defisil atu komunika urjenti bainhira hetan dezastre ba moras ruma iha postu saúde manán.
Notísia relevante:Abitante Bene-Ufe preokupa ho peste ne’ebé hamate fahi
Hataan ba rekomendasaun ne’e, Sekretáriu Rejionál ba Asuntu Saúde, Luís de Jesus Neno, rekoñese karreta multi-funsaun avária, maibé daudaun ne’e, prosesa iha parte aprovizionamentu ba konkursu públiku hodi halo ba manutensaun.
“Loos duni karreta operasionál hotu durante ne’e paradu tanba, iha tinan hirak liuba, Planu Asaun Anuál autoridade anteriór sira prepara, depois ami ezekuta de’it, tan ne’e iha 2024 karreta sira-ne’e sedauk halo manutensaun, ne’ebé tinan kotuk ami tau ona planu, no tinan ne’e mak foin rezolve, tempu badak sei iha tenderizasaun atu bele hadi’a karreta sira-ne’e,” nia informa.
Nia informa, kona-ba karreta multifunsaun sira, kondisaun sei estavél hela, maibé presiza manutensaun de’it ba roda tanba karreta hirak-ne’e, daudaun ejiste iha Oekusi hamutuk tolu, koloka iha sentru saúde Baoknana, Pássabe no ida iha sentru saúde Quimaonteko.
Notísia relevante:Abitante Bene-Ufe rekomenda MI harii postu provizóriu ba UPF iha Naktuka
Jornalista: Abílio Elo Nini
Editór: Florencio Miranda Ximenes
