OEKUSI, 24 Abríl 2025 (TATOLI) – Família 100-resin iha suku Bene-Ufe, sub-rejiaun Nítibe, Rejiaun Administrativa Espesiál Oekusi Ambeno (RAEOA) seidauk asesu liña elétrika dezde ukun-aan.
Tanba ne’e, xefe suku Bene-Ufe, Marcos Meni, rekomenda ba Governu, liuhusi autoridade RAEAOA atu apoia temporariamente painél solál, nune’e abitante sira bele hetan naroman iha tempu kalan.
Nia dehan iha bairru Naktuka uma-kain 78 no Biele 20 mak seidauk asesu ba eletrisidade.
“Tanba ne’e, rekomenda apoia netik painél solár ba sira. Iha autoridade sesante konsege apoia ba sira iha Biele, maibé kle’ur ona, barak mak aat no uma-kain hitu iha Bonen besik TTU ne’e mós seidauk asesu ahi dezde ita ukun-anan”, Xefe Suku Bene-Ufe hato’o iha diálogu komunitáriu iha sede suku Bene-Ufe.
Autoridade lokál ne’e rekoñese katak fatin tolu ne’e konsidera izoladu, tanba problema estrada atu Biele no Bonen laiha, nomós atu bá Naktuka, nune’e difikulta Governu atu dada liña eletrisidade bá to’o fatin sira-ne’e.
“Sé estrada di’ak karik, uluk kedas Governu fó ona solusaun, maibé tanba dalan atu bá Biele mak laiha, motór mós labele tama tanba sa’e foho”, katak.
Notísia relevante:Autoridade rona preokupasaun komunidade Bene-Ufe hodi aposta ba PAA 2026
Hatán ba preokupasaun ne’e, Prezidente Autoridade RAEOA, Rogério Tiago Lobato, promete katak, sei koordena ho parte Eletrisidade de Timor-Leste (EDTL) Oekusi atu halo identifikasaun molok hetan fó painél solár.
“Ita loloos asesu ona, tanba Oekusi maioria hetan ona naroman, maibé ha’u sei ko’alia sira EDTL atu mai identifika uma-kain hira mak presiza apoia ahi, nune’e ita bele aloka hela osan hodi sosa painél solár, tanba imi iha ne’e fronteira direta ho maluk sira sorin [Indonézia], entaun presiza hetan naroman husi Estadu”, nia promete.
Notísia relevante:RAEOA prevee millaun $1,2 kompleta liña eletrisidade
Jornalista: Abílio Elo Nini
Editora: Maria Auxiliadora
