OEKUSI, 06 Maiu 2025 (TATOLI) – Komunidade sira iha suku Bene-Ufe, sub-rejiaun Nítibe, Rejiaun Administrativa Espesiál Oekusi Ambeno (RAEOA), rekomenda ba Governu atu harii postu provizóriu ba membru Polísia Unidade Patrollamentu Fronteira (UPF) iha bairru Naktuka, nune’e bele hala’o seguransa iha liña fronteira.
Abitante bairru Naktuka, Júlio Cuno, informa durante ne’e mota tuun difikulta seguransa UPF sira atu hala’o patrollamentu iha liña fronteira Naktuka, tan ne’e presiza harii postu UPF iha fatin maske ho provizóriu de’it.
Notísia relevante:UPF desmente halo agresaun fízika hasoru abitante ida iha Naktuka
“Bele ka la’e Governu halo postu temporáriu ba UPF sira iha bairru Naktuka, tanba ho razaun katak iha tempu udan mota tuun sira labele ultrapasa, tanba mota bo’ot tan ne’e ha’u sujere presiza konsidera, nune’e bainhira mota tuun sira bele toba iha Naktuka. Tanba kuandu udan bo’ot sira labele bá mota sorin,” nia hateten iha Oekusi foin lalais ne’e.
Iha fatin hanesan, Xefe Suku Bene-Ufe, Marcos Meni, reforsa durante ne’e komunidade sempre apoia seguransa sira bainhira mota tuun.
“Maibé di’akliu, Governu presiza harii fatin ketak ba ita-nia seguransa sira, tanba mai ho arma nasaun nian, ne’ebé presiza fatin dignu ba sira. Ami espera Governu bele konsidera ida ne’e,” nia dehan.
Notísia relevante:Xanana sei hasoru Prabowo aborda fronteira Naktuka tuir akordu Olanda no Portugál
Hataan ba rekomendasaun ne’e, Prezidente Autoridade RAEOA, Rogério Tiago Lobato, konsidera importante, maibé nia parte sei koordena ho Ministériu Interiór.
“Ida-ne’e asuntu nasionál, importante tenke konsidera, maibé ha’u sei ko’alia ho Ministériu Interiór atu haree ne’ebé nu’udar Prezidente Autoridade, ami promete oferese fatin ida, liuliu fatin ba Diresaun Rejionál Agrikultura, sira iha edifisíu rua ka haat iha ne’ebé sei oferese ida ba UPF hodi okupa, nune’e bele hala’o misaun seguransa iha fronteira,” nia hateten.
Notísia relevante:PR Horta fó konfiansa ba Xanana solusiona fronteira Naktuka
Jornalista: Abílio Elo Nini
Editór: Florencio Miranda Ximenes
