OEKUSI, 01 Maiu 2025 (TATOLI)–Komandante Polísia Unidade Patrollamentu Fronteira (UPF), superintendente Polísia Euclides Belo, desmente sira-nia parte halo agresaun fízika hasoru abitante Naktuka ida ho inisiál CO.
Nia dehan sira halo detensaun ba abitante ne’e hodi submete ba prosesu investigasaun tanba suspeita ba provokasaun iha liña fronteira.
Notísia relevante:UPF garante seguransa ba abitante sira iha Naktuka
“Ita-nia membru UPF garante seguransa iha fronteira, ita la utiliza atuasaun fizika hasoru ema ruma, só ita halo identifikasaun ba sidadaun ida, ne’ebé ita diskonfia no hatudu iha evidénsia ida, no daudaun ne’e ita kanaliza ona ba komandu PNTL Oekusi, no enkamiña ona iha Ministériu Públiku hodi halo prosesu”, Eculides Belo klarifika ba jornalista sira iha suku Usitako, ohin.
Notísia relevante:Abitante Naktuka halo servisu agrikultura la’o normál
Komandante UPF Euclides Belo, rejeita atu esplika detallu kona-ba evidénsia ne’ebé UPF identifika, tanta kazu ne’e submete ona iha Ministériu Públiku.
“Deklarasaun ne’ebé hala’o iha Dili, UPF hala’o de’it seguransa iha Naktuka no identifika mós sidadaun ne’e iha Naktuka, signifika informasaun sira-ne’e falsa, tanba hafoin kaptura, UPF identifika evidénsia balu, ne’ebé saida mak ita halo PNTLfó ajuda prosesu ba Ministériu Públiku, kuandu tama ona, ami labele fó sai públika saida de’it, tanba ne’e segredu justisa”, nia klarifika.
Hanesan komandante UPF hamutuk ho komandante PNTL Oekusi, husu ba sidadaun hotu atu kuidadu intervensaun sira kona-ba asuntu fronteira nian, tanba fronteira la’ós kompeténsia UPF nian atu rezolve no negósia ho sé de’it.
“Ami garante de’it seguransa tuir lei, embora ida-ne’e ami husu ba sidadaun hotu nu’udar timoroan, atu apoia UPF ne’ebé garante seguransa iha liña fronteira, fó tempu ba ita-nia Governu no Estadu atu-bele rezolve liña fronteira tuir tratadu internasionál, ne’ebé situsaun jerál daudaun ne’e iha área Naktuka kontroladu, tanba komunidade kontinua halo natar no toos, no UPF ninia knaar mak garante seguransa ba sidadaun”, nia apela.
Notísia relevante:UPF ho Satgas-Pamtas halo patrullamentu koordenasaun iha Naktuka
Kazu ne’e akontese iha loron 28 Abríl 2025, ne’ebé membru UPF sira detein bainhira halo patrullamentu iha liña fronteira.
Jornalista : Abílio Elo Nini
Editora : Rita Almeida
