OEKUSI, 03 Abríl 2025 (TATOLI) – Polísia Nasionál Timor-Leste (PNTL) liuhusi Unidade Patrollamentu Fronteira (UPF), hala’o patrullamentu iha liña fronteira Naktuka, aldeia Manan,suku Bene-Ufe, sub-rejiaun Nítibe, Rejiaun Administrativa Espesiál Oekusi Ambeno (RAEOA), hodi asegura seguransa ba komunidade atu moris hakmatek, nune’e halo servisu agrikultura hanesan natar no toos.
Daudaun ne’e, Polísia Patrollamentu Fronteita (UPF) ho Santgas-Pamtas kontinua halo patrollamentu koordenasaun iha área Naktuka hodi garante seguransa iha liña fronteira.
Notísia relevante: Abitante Naktuka halo servisu agrikultura la’o normál
Komandante UPF, Superintendente Polísia Euclides Belo, relata patrollamentu ne’e realiza tanba garante sidadaun sira iha área Naktuka atu moris ho hakmatek hodi hala’o servisu loro-loron. .
“Informasaun ne’ebé espalla iha mídia sosiál, katak ita-nia komunidade sira iha Naktuka sente tauk ba ameasa ruma no sente la seguru, tan ne’e kualidade hanesan Komandante UPF, ohin ha’u halo vizita no patrollamentu supreza mai to’o Naktuka hodi haree rasik realidade iha terrenu ne’e tebes ka la’e, maibé realidade ha’u ho membru sira halo patrollamentu haku’ur mota mai to’o natar Naktuka hasoru komunidade sira-ne’ebé hela iha Naktuka informa mai UPF katak informasaun ne’ebé viral iha mídia sosiál ne’e falsu no laloos,” dehan Komandante Euclides Belo ba jornalista sira iha Naktuka.
Notísia relevante:Xanana husu Naktuka-oan promove dame hodi hein solusaun ba problema fronteira terestre
Ho situasaun ne’e, Komandante UPF sente orgullu no agradese ba kontribuisaun komunidade sira iha área Naktuka.
“Nu’udar Komandante, garante seguransa iha liña fronteira, husu ba komunidade no mídia hotu, atu partilla informasaun ruma karik, presiza kruza ho informasaun real iha térrenu, labele tuur de’it iha Dili, depois pasa informasaun laloos hodi halo komunidade sira iha Naktuka bele pániku, realidade komunidade sira iha Naktuka sente hakmatek, kontente hodi hala’o nafatin atividade agrikultór nian,” nia apela.
Entretantu, tuir observasaun direita husi Jornalista Ajénsia TATOLI, I.P, iha terrenu katak abitante sira kontinua hala’o servisu natar, balun kuda hare, balun halai natar ho totál populasaun iha Naktuka hamutuk 180 husi uma-kain 78.
Notísia relevante:UPF ho Satgas-Pamtas halo patrullamentu koordenasaun iha Naktuka
Xanana garante solusiona problema Naktuka
Jornalista: Abílio Elo Nini
Editór: Florencio Miranda Ximenes
