OEKUSI, 18 Fevereiru 2025 (TATOLI)– Primeiru-Ministru, Kay Rala Xanana Gusmão, tersa ohin, hala’o vizita no realiza diálogu ho komunidade iha Bairru Naktuka, suku Bene-Ufe, Sub-Rejiaun Nítibe, hodi kontinua enkoraja populasaun sira atu promove dame ho komunidade nasaun viziñu, hodi hein solusaun ba problema fronteira terestre.
“Imi kontinua halo natar no to’os, kuandu sira mai ameasa imi lalika simu tanba ita hakarak promove dame liuliu haree malu di’ak tanba imi iha Naktuka ho Oepoli sei iha relasaun família, ita buka problema atu halo saida?, tanba sei provoka malu ita sei la manán buat ida. Tanba asuntu ne’e (fronteira terestre) ha’u sei ko’alia ho Prezidente Repúblika Indonézia, Prabowo Subianto hodi rezolve,” PM Xanana Gusmão, ko’alia asuntu bainhira halo diálogu ho komunidade sira iha Naktuka, ohin.
Notísia relevante:UPF ho Satgas-Pamtas halo patrullamentu koordenasaun iha Naktuka
Xefe Governu husu ba abitante Naktuka bele bá-mai liuhusi fronteira importante labele provoka malu no istória malu tanba problema fronteira terestre ne’e, Governu rai-rua nian sei bele buka solusaun.
“Ita nu’udar agrikultór kontinua servisu halo natar no toos. Ita husik sira tama halo toos iha sira-nia kintal, imi iha ne’e halo imi-nian, husi ne’e ita sei manán saida?, ita manán mak ne’e, amizade, família no manán sira ita-bele ba Fatusinai atu halo ita-nia kultura, tanba durante ita hamulak de’it ita tasi-ibun la to’o fatin ne’e,” Xefe Governu fó hanoin.
Biban ne’e, Xefe Governu enkoraja ba Polísia Unidade Fronteira (UPF) atu kontinua asegura komunidade sira no promove liña koordenasaun servisu ho Satuan Tugas Pengamanan Perbatasan (Satgas-Pamtas), Tentara Nasionál Indonézia (TNI), nune’e bele hamoris unidade entre komunidade rai rua ne’e iha liña fronteira.
Aleinde ne’e, Primeiru-Ministru husu ba Jestór Sub-Rejiaun Nítibe atu kontinua halo koordenasaun ho autoridade sira iha Oépoli Amfoan-NTT, nune’e bele tu’ur hamutuk ko’alia ba malu liuhusi nahe biti bo’ot, nune’e komunidade rai rua bele kuda metin domin no dame iha liña fronteira.
“Sei imi apoia realiza nahe biti bo’ot, ha’u prontu apoia ita tuur iha fronteira atu ko’alia ba malu hanesan maun-alin,”katak Xanana.
Notísia relevante:Abitante Naktuka fó fiar bá Xanana luta to’o finaliza fronteira terrestre
Iha fatin hanesan, Jestór sub-rejiaun Nítibe, Agustinho Afulit, relata nia parte kontinua halo komunikasaun ho autoridade Amfong-NTT nia hodi fasilita komunidade kria dame iha fatin ne’e.
“Durante ne’e, ha’u komunika ona mós ho administradór postu Amfoan Oépoli, ne’ebé ha’u sei hasoru Prezidente Autoridade RAEOA atu apoia ita halo vizita koordenasaun ba sorin, nune’e ita bele hato’o ita-nia pedidu ba Autoridade sira iha Amfoan, kuandu sira konkorda ami sei fó hatene Primeiru-Ministru atu partisipa,” nia promete.
Entretantu, Komunidade Naktuka, Domingos Falo, kontinua fó fiar no esperansa ba Governu Timor-Leste, liuliu Primeiru-Ministru atubele rezolve lalais problema Naktuka, nune’e komunidade bele hela no la’o ho hakmatek.
“Ami nia preokupasaun mak ne’e presiza rezolve ona fronteira ne’e atu parte rua bele hatene aan hodi ita bele la’o bá mai ho hakmatek. Tanba kuandu ita la rezolve ita tama-sai sei nafatin problema,” nia propoin.
Entretantu, iha vizita ofisiál ne’e hetan akompañamentu husi Przeidente Autoridade RAEOA, Rogério Tiago Lobato, Koordenadór ZEEDOA, João Mendes Gonçalves no Komandante UPF, Superintendente Euclides Belo.
Notísia relevante:Xanana garante solusiona problema Naktuka
Jornalista: Abílio Elo Nini
Editór: Florencio Miranda Ximenes
