OEKUSI, 01 Abríl 2025 (TATOLI) – Abitante sira iha Naktuka, suku Bene-Ufe, sub-rejiaun Nítibe Rejiaun Administrativa Espesiál Oekusi Ambeno (RAEOA), kontinua hala’o servisu agrikultura hanesan natar no toos ho normál.
Abitante Naktuka, Dominicus Anunu Eko, hateten katak durante ne’e komunidade Naktuka hela hakmatek hodi hala’o servisu nuudar agrikultór.
Notísia relevante:Xanana husu Naktuka-oan promove dame hodi hein solusaun ba problema fronteira terestre
“Loron kalan ami hela iha ne’e, maibé ami la haree no rona ema ameasa ami iha ne’e, ami servisu livre halo to’os no natar la’o ba mai laiha ema ameasa, ema seluk dehan tanba sira hela iha parte klaran, hanesan Citrana, Bitila no suku seluk tan, ami hela iha Naktuka, sira ko’alia la loos, tanba sira hela iha klaran, ami iha fronteira laiha buat ida, sira ko’alia iha nasionál ne’e, ko’alia falsu tanba ami uma-kain 78 hela hakmatek. UPF sira mós loron-loron mai patrulla, ami iha ne’e servisu hakmatek hela, laiha ema ameasa, TNI ka sidadaun baibain sira la tama mai,” Dehan nia ba jornalsita sira iha Naktuka, segunda ne’e.
Notísia relevante:UPF ho Satgas-Pamtas halo patrullamentu koordenasaun iha Naktuka
Iha fatin hanesan, Xefe Aldeia Manan, Octoviano Falo, nu’udar natar na’in iha área Naktuka sente hela ho hakmatek tanba hetan seguransa másima husi Polísia Unidade Patrollamentu Fronteira (UPF).
“Komunidade halo natar iha ne’e, mak ema mai ameasa, ne’e liafuan falsu, ami mak iha terrenu, loron-loron ami hamutuk kuda hare iha ne’e, dalaruma ami kuda hotu ida ba kuda tan seluk nian tan, maibé ami la haree ita-maluk husi sorin atu mai ameasa ami”
Nia hatutan “Se bainhira sira husi sorin mai ameasa populasaun, sempre kontaktu UPF sira, maibé kada loron-loron UPF mantein patrollamentu iha liña fronteira Naktuka, dalaruma kalan toba iha Naktuka”.
Nune’e, Xefe Aldeia ne’e dehan: “Situasaun atuál agora iha Naktuka mak hanesan ne’e duni, agora komunidade servisu hakmatek hela, laiha maluk ida husi sorin ka TNI ou ema deskoñesidu atu mai ameasa ami, tanba UPF loron-loron iha ne’e, tanba ha’u laiha telefone atu haree semak mak ko’alia iha vidio ne’e dehan ema mai ameasa ami, ida-ne’e la loos no lia-fuan falsu tanba komunidade servisu iha Natar Naktuka Biofi ektare 77,97 ho totál natar na’in 306, kada loron halo servisu natar iha Naktuka,” nia rejeita.
Notísia relevante: Governu tenke mantein estakmentu antigu iha Naktuka tuir akordu
Entretantu, Natar na’in iha Naktuka, Maria Siku, dehan “Ami loron-loron iha ne’e, tanba agora tempu natar ami tenke halai natar balu kuda ona, ne’ebé ami iha ne’e laiha problema balun dehan TNI sira tama mai, maibé ami la haree ida,” nia hateten.
Rekorda fali katak, iha inisíu fulan-Marsu 2025, Primeiru-Ministru, Kay Rala Xanana Gusmão hala’o vizita ba abitante sira iha Naktuka, hodi husu atu promove kooperasaun no rekonsialisaun ho komunidade sira iha Amfoan Nusa Tengara Timur.
Daudaun ne’e, Polísia Patrollamentu Fronteita (UPF) ho Santgas-Pamtas kontinua halo patrollamentu koordenasaun iha área Naktuka hodi garante seguransa iha liña fronteira.
Notísia relevante:Xanana seidauk foti desizaun kona-ba Naktuka
Jornalista: Abílio Elo Nini
Editór: Florencio Miranda Ximenes
