JAKARTA, 26 janeiru 2024 (TATOLI) -Primeiru-Ministru Kay Rala Xanana Gusmão hateten, nia parte seidauk foti desizaun kona-ba segmentu naun rezolvidu Noel besi Citrana liuliu iha problema fronteira Naktuka, Oé-Cusse.
“Ha’u seidauk foti desizaun ba kazu Naktuka,” Xefe Governu, Xanana Gusmão, hateten ba jornalista sira liuhosi konferénsia imprensa hafoin hala’o enkontru bilaterál ho PR Jokowi iha Istana Bogor, Jawa Barat, iha Otel Indonézia Kempinski iha Bundaran HI, Jakarta, Indonézia.
Xefe ezekutivu ne’e hateten, kona-ba asuntu ne’e, nia parte sei ba direta iha Oé-Cusse atu esplika klaru asuntu ne’e ba ba povu iha Rejiaun Autonóma Espesiál Oé-Cusse-Ambeno (RAEOA).
Tanba ne’e, iha tempu besik, segunda semana oin, nia sei dezloka ba Oé-Cusse atu ko’alia kona-ba asuntu ne’e ba povu.
Entretantu, Primeiru-Ministru, Kay Rala Xanana Gusmão sei ko’alia ho governu lokál NTT atu haree ba kestaun fronteira no haree ba povu NTT no Oé-Cusse nia moris di’ak.
Tanba, nia dehan, iha enkontru bilaterál ho Prezidente repúblika (PR) Indonézia Jokowi ne’e ko’alia mós kona-ba povu NTT no Oé-Cusse, tanba enkontru bilaterál ne’e ho intensaun atu dezenvolve Oé-Cusse.
Entretantu, nia hateten, iha vizita PM ofisiál ba dahuluk ne’e seidauk bele asina akordu formál ba fronteira terrestre tanba seidauk iha konsensu.
“Iha vizita ofisiál dahuluk ne’e mai atu konfirma no konsolida de’it” Xanana hateten.
Antes nee, Vise Ministru ba asuntu Parlamentár, Adérito Hugo da Costa, hateten, kestaun kona-ba fronteira terrestre ne’e Primeiru-Ministru, Kay Rala Xanana Gusmão sei esplika ba povu Timor-Leste.
Jornalista : Cancio Ximenes
Editór : Rafael Ximenes de A. Belo
