DILI, 23 Abríl 2025 (TATOLI) – Prezidente Fundasaun Meskita Annur, Abdullah Said Sagran, konsidera Papa Francisco nu’udar aman ba dokumentu fraternidade umanu ho objetivu fundamentál hametin pás iha mundu no konvivénsia komún.
Prezidente Fundasaun Meskita Annur temi ida-ne’e, hafoin Santu Padre nia falesimentu iha loron 21 fulan-Abril hodi hanoin nia memoria sira-ne’ebé iha.
“Ita sente lakon ida, ida-ne’e Maromak nia dalan ba ita hotu. Ita-nia lider mundiál Igreja Katólika Amu Papa Francisco auzente, maibé destinu ita-nia moris ne’e Maromak nian, ita tenke simu lakon ida-ne’e,” Abdullah Said Sagran ba TATOLI iha liuhusi telefónika, kuarta ne’e.
Nia fó hanoin katak Papa Francisco halo nia reflesaun hamutuk ho líder islámiku ida hosi Médiu Oriente, iha tinan 2019 no halibur valór relijioza sira hodi konvense komunidade mundiál kona-ba fraternidade umana.
“Ema nu’udar kriatura Maromak nian, nune’e ho ninia mizerikórdia nia haruka ninia mensajeiru sira hodi orienta umanidade. Ohin loron funu iha mundu, tanba ne’e dokumentu ne’e reflete lasu sira fraternidade umana nian. Papa hala’o nia misaun iha kontestu ida-ne’e, nune’e ita bele bolu nia nu’udar aman ba fraternidade umana,” nia hatutan.
Abdullah subliña, Timor-Leste adota protokolu Dubai nian no hetan ratifikasaun husi Parlamentu Nasionál, hodi destaka katak Timor-Leste hanesan nasaun ida-ne’ebé hola parte iha misaun fraternidade umana nian.
Prezidente mós fó hanoin katak Papa Francisco foin lalais ne’e vizita Timór Leste, hodi hatudu ba mundu ezemplu ida atu prezerva no haburas fraternidade umana.
Nia dehan, Timor-Leste sei nunka iha konflitu interese relijiozu no iha era ukun-an tenke harii amizade no dame.
“Papa Francisco hakuak relijiaun hotu-hotu iha mundu no la halo diskriminasaun ba ema ida. Ami konsidera ida-ne’e furak tebes. Papa mate ona, maibé nia hanoin moris nafatin iha ita-nia leet, iha umanidade nia leet atu nune’e ita bele moris hamutuk,” nia hakotu.
Jornalista : Felicidade Ximenes
Editór: Evaristo Soares Martins
