ANLA emite ona lisensiamentu ambientál 353 durante Janeiru-Setembru
DILI, 26 Setembru 2026 (TATOLI)—Autoridade Nasionál Lisensa Ambientál, Institutu Públiku (ANLA, I.P) emite ona lisensiamentu ambientál hamutuk 353, kompostu husi kategoria A iha tolu, kategoria B 12 no kategória C iha 328.
“Hafoin ami atribui lisensiamentu ambientál, ami mós halo monitorizasaun ba kompañia atu sira labele komete irregularidade, tanba bainhira sira komete, ami sei fó sansaun liuhusi suspende sira-nia atividade, depende ba sira kompleta ona rekezitu entaun ami reativa, kompañia sira mós tenke submete relatóriu kada fulan-neen ba ANLA,” Diretór ANLA, I.P Gilberto Correia Soares relata ba Ajénsia TATOLI iha nia knaar fatin, Akait, foin lalais ne’e.
Notísia relevante : ANLA rekolla taxa rihun $58 husi empreza 600-resin trata lisensiamentu ambientál
Nia dehan, husi atribuisaun ne’e instituisaun konsege rekolla resitas $25.800 husi kompañia privadu, enkuantu husi instituisaun Estadu nian la selu taxa bazeia ba dekretu-lei nú.2/2025 kona-ba Fixa valór taxa no dívida iha ámbitu prosedimentu lisensiamentu ambientál.
“Maneira selu taxa ne’e bazeia mós ba kategoria, katak kada kategoria selu la hanesan, iha kategória A, B no C iha faze informativa selu $50, iha faze avaliasaun dokumentu ba kategoria A selu $500, kategoria B selu $250, bainhira emite ona lisensa ba kategoria A selu $1.000, kategoria B selu $500. Enkuantu ba kategoria C la selu ona selu de’it iha faze informativa,” nia esplika.
Jornalista : Alexandra da Costa
Editora : Julia Chatarina
