DILI, 09 Marsu 2026 (TATOLI) – Autoridade Nasionál Lisensiamentu Ambientál (ANLA) dezde Janeiru 2025 rejista empreza hamutuk 600-resin mak trata lisensiamentu ambientál ba implementasaun projetu tuir kategoria tolu iha Timor-Leste.
Nia esplika iha lisensiamentu ba projetu kategoria tolu ne’e mak C ba ofisina, loja, edifísiu, reabilitasaun estrada, karpintaria no seluk tan.
Kategoria B ba otél boot sira ne’ebé harii hanesan CVD sira iha Otél Timor Plaza, no kategória A ne’e Portu Tíbar, Otél Palm Springs, no seluk tan.
“Husi sertifikadu kategória tolu ne’e empreza ne’ebé rejista mai husi nasionál no internasionál, hahú husi tinan kotuk mai to’o agora ANLA rekolla taxa $58.900”, Prezidente Autoridade Nasionál Lisensiamentu Ambientál, Maximiano Oliveira, hateten ohin.
Nia subliña katak ANLA nafatin halo monitorizasaun ba atividade sira ne’ebé empreza sira halo, no kontrola mós ba empreza sira-nia lisensiamentu, bainhira sira-nia lisensiamentu ne’e mate fó hanoin sira tenke halo renovasaun tanba bainhira la kumpre bele multa tuir Dekretu-Lei númeru 39/2022 ho montante hahú husi $5.000 to’o $25.000.
Difikuldade ne’ebé ANLA hasoru durante ne’e mak falta rekursu umanu no transporte atu kobre ba munisípiu sira hodi halo avaliasaun dokumentu iha terrenu. “Ita daudaun ne’e transporte iha rua no rekursu umanu ka tékniku hamutuk ema na’in-24”, dehan.
Enkuantu kona-ba investimentu estaleiru iha postu administrativu Laleia, munisípiu Manatutu husi empreza Tsuneishi Timor Shipbuilding Unip., Lda., husi nasaun Japaun, nia parte hateten parte ANLA mós iha 2025 halo indentifikasaun ba rai ne’ebé sei harii estaleiru, prosesu sira rezolve ona no agora tama ba faze finál fulan ne’e sira bele hetan ona lisensa ambientál.
Tuir nia, rai ne’ebé empreza Tsuneishi sei utiliza ba harii estaleiru ne’e parte rai-maran pur volta ektare rua no ba parte tasi-laran nian pur volta ektare 4 to’o 5.
Projetu ne’e nia finansiamentu mai husi Governu Japaun aleinde harii estaleiru sei iha mós universidade, ospitál, otél no seluk tan.
Jornalista: Arminda Fonseca
Editora: Maria Auxiliadora
