Projetu reabilitasaun estrada Batugadé-Balibó finaliza iha Dezembru

BOBONARU, 23 Setembru 2026 (TATOLI)-Koordenadór Infraestrutura Ministériu Obra Públika, munisípiu Bobonaru, Fernando de Fátima, informa katak projetu reabilitasaun estrada trosu Batugadé bá Balibó Vila sei finaliza iha Dezembru 2026.

Fernando ralata katak daudaun ne’e progresu fizíku pakote I ne’ebé responsabliza husi empreza King Construction Unipessoal Lda., atinje 66,34% no pakote II halo husi empreza Timobest Trading Unip., Lda. atinje 50%.

“Tinan ne’e nia bele finaliza iha Dezembru nia-laran. Pakote I ne’e hela de’it kilómetru ida, tarde oitúan iha pakote II tanba serbisu pelengkap jalan ne’e mak seidauk hotu”, nia informa tersa-feira ne’e.

Ministeriu Obra Públika tau prioridade ba dezenvolvimentu infraestrura estrada nian hodi fasilita movimentasaun komunidade bá kualkér atividade, liuliu atividade ekonómika tanba Batugadé-Balibó besik liu fronteira no sai odomatan ba ekonomia sentrál.

Projetu ho distánsia kilómetru 12 ne’e iha pakote rua, dahuluk ho kustu $3.439.179,37 no daruak ho kustu $4.401.638,09. Projetu ne’e hala’o ho durasaun kontratu tinan ida.

Notísia relevante: Empreza rua hahú reabilita estrada husi Batugadé-Balibó

Jornalista: Sergio da Cruz

Editora: Maria Auxiliadora