BOBONARU, 10 Novembru 2025 (TATOLI) – Empreza King Construction no Tomobest Trading Unipessoal Lda hahú reabilita estrada diresaun husi rotunda Batugadé bá postu administrativu Balibó, munisípiu Bobonaru, ho distánsia kilómetru 12.
Serbisu fíziku iha terrenu ne’e mak parte Tomobest Unipessoal ke’e hela bee-dalan no King Construction ateru rai husi rotunda Batugadé to’o ponte Mota-Marak.
Komunidade Batugadé, Feliciano de Jesus, hateten bainhira obra ne’e finaliza mak bele fasilita movimentu públiku.
Notísia relevante: MOP hatuur fatuk dahuluk ba projetu reabilitasaun estrada husi Batugadé bá Balibó
“Ami-nia estrada ne’e tinan barak ona aat. Ita atu bá-mai Dili-Maliana husi Balibó tun mai ne’e sente susar loos, tanba dalan ku’ak, fatuk-laran, rai-rahun. Agora sira ateru ona ne’e ami sente di’ak, depois asphalt tan ne’e di’ak liután”, naa dehan ba Tatoli, ohin.
Rezidente Zélia Afonso Soares hatene projetu ne’e presiza halo, tanba Batugadé-Balibó hanesan lalenok ba nasaun. “Ema rai seluk, liuliu ita-nia maluk sira husi Indonézia mai Timór sira liu uluk mak Batugadé, ne’ebé presiza tebes estrada di’ak, tanba ne’e dignidade nasaun nia”, nia afirma.
Zelia rekomenda ba empreza konstrutora atu implementa obra ne’e ho kualidade no finaliza tuir tempu determinadu.
“Estrada ne’e di’ak para ita bele uza ba tempu naruk, tanba la’ós ohin aat, aban ita foti osan halo fali. Ne’e lori tempu naruk, entaun presiza halo di’ak kedas depois halo hotu lalais para tinan oin ne’e ami bele uza ona”, nia hato’o.
Tuir observasaun jornalistaTatoli iha terrenu, movimentasaun transporte públiku kontinua la’o hanesan normál.
Projetu ne’e iha pakote rua, dahuluk responsabliza husi empreza King Construction ho kustu $3,439,179.37 no pakote daruak husi Tomobest Trading Unip. Lda ho kustu $4,401,638.09. Projetu ne’e sei hala’o ho durasaun kontratu tinan ida.
Jornalista: Sergio da Cruz
Editora: Maria Auxiliadora
