MOP hatuur fatuk dahuluk ba projetu reabilitasaun estrada husi Batugadé bá Balibó
BOBONARU, 11 Setembru 2025 (TATOLI) – Ministériu Obra Públika (MOP) hamutuk ho Autoridade Munisípiu Bobonaro lansa, ohin, fatuk dahuluk ba projetu reabilitasaun estrada protokolu husi rotunda suku Batugadé bá postu administrativu Balibó Vila, munisípiu Bobonaru, ho distánsia kilómetru 12.
Ministru Obra Públika, Samuel Marçal, hateten ho implementasaun obra ne’e Timor-leste hakat tan pasu ida ba oin hodi hakonu povu nia esperansa ba ukun rasik-an.
Nia dehan tau prioridade ba dezenvolvimentu infraestrura estrada nian hodi fasilita movimentasaun komunidade bá kualkér atividade, liuliu atividade ekonómika.
“Bainhira estrada di’ak, ita-nia ekonomia mós la’o ho di’ak. Parte ida-ne’e besik liu fronteira, sai odamatan ekonomia ba sentrál ne’ebá”, nia hateten hafoin lansamentu fatuk dahuluk.
Governante ne’e apresia ho populasaun ninia pasiénsia tanba tempu naruk ho kondisaun estrada ne’ebé iha, maibé nafatin iha esperansa ba dezenvolvimentu país.
Prezidente Komisaun E Parlamentu Nasionál ba Asuntu Infraestrutura, Marcos Xavier, sente orgulu bele partisipa no sai sasin ba lansamentu estrada ne’ebé implementa ho orsamentu tinan 2025 no aprovadu husi orgáun lejislativu.
“Estrada Batugade-Balibó dezde Oitavu Governu ami kestiona beibeik iha plenária Parlamentu Nasionál. No fim ohin ita bele mai lansa duni, dalan ida ne’ebé importante tebetebes ba munisípiu Bobonaru”, deputadu husi bankada CNRT ne’e dehan.
Prezidente Autoridade munisípiu Bobonaru, Paulo Moniz Maia, agradese ba esforsu ne’ebé Ezekutivu halo, tanba povu hein kle’ur ona.
Autoridade munisípiu ne’e husu ba empreza konstrutora atu implementa obra referida ho responsabilidade tuir tempu ne’ebé iha no garante nia kualidade.
Enkuantu projetu ne’e iha pakote rua, dahuluk responsabliza husi empreza King Construction Lda ho kustu $3,439,179.37 no pakote daruak husi empreza Tomobest Trading Unip. Lda ho kustu $4,401,638.09. Projetu ne’e sei hala’o ho durasaun kontratu tinan ida.
Notisía relevante: Komunidade preokupa projetu reabilitasaun estrada rurál iha Bobonaru vila abandonadu
Jornalista: Sergio da Cruz
Editora: Maria Auxiliadora
