BOBONARU, 25 Juñu 2025 (TATOLI)—Komunidade no líder komunitária sira preukupa ho projetu reablitasaun estrada rurál iha suku Bobonaru vila, postu administrativu Bobonaru, munisípiu Bobonaru ne’ebé durante tinan ida ona abandona husi kompañia lokál Centeleziumen Unipesoál, Lda.
Notísia Relevante: Estrada rurál kilómetru 261 iha Bobonaro seidauk reabilita
Xefe suku Bobonaru villa, Jacinto Godinho Pereira, preokupa tanba durasaun tempu finaliza obra ne’e dezde 2023 maibé to’o 2025 ona mós servisu fíziku seidauk konklui no kompañia mós durante ne’e laiha informasaun ruma katak atu projetu ne’e empreza ezekuta obra ne’e.
“Ha’u hanoin estrada ne’e kle’ur tia ona besik tinan tolu ona, maibé to’o agora kompañia ida kaer ne’e abandonadu hela. Momentu ne’e, Vise Ministru Obra Públika mai haree tiha, maibé to’o agora projetu la la’o. Ami líder komunitária hato’o iha nivél munisípiu, maibé kompañia la hala’o to’o ohin. Komunidade husu mai ami dalan ne’e ate data la hotu ne’e ninia prosesu to’o iha ne’ebé. Sira halerik hela no husu ba Governu iha tempu badak bele buka kompañia ida oinsá bele hadi’a tia dalan ne’e,” Nia informa ba Agência Tatoli iha nia kna’ar fatin, kuarta ne’e.
Xefe suku Jacinto reforsa, problema ne’e afeta tebes ba atividade komunidade liuliu tempu udan tanba kompañia nahe simente rohan-rohan de’it no balun husik hela rai mamuk de’it.
“Komunidade kuaze suku haat hanesan suku Lour, Sibuni, Molop no Ai-Asa balun, tempu udan sira atu lori produtu lokál mai merkadu araska la halimar. Depois, dalaruma motor sira hulan de’it, tanba ne’e ami ami husu oinsá mak troka tiha kompañia ne’e para kompañia seluk bele mai kontinua konstrui dalan ne’e, nune’e komunidade bele utiliza,” nia dehan.
Aleinde ne’e, Komunidade aldeia Mazop, suku Ai-Asa, Camilo Lopes, rekomenda ba Governu atu foti medidas hodi kontinua obra ne’e, tempu udan estrada ne’e difikulta tebes movimentasaun transporte.
“Estrada ne’e ami husi parte tun ba Mazop, Odelgomo, Sibuni, Molop ami ba bazar estrada tama tun ba Bobonaru to’o parte nia-laran to’o ohin loron estrada sei aat hela. Udan boot tan, halo nusa mak estrada ne’e para hela hanesan ne’e sira la servisu ne’e, saida mak Governu atu halo. Ita hakarak estrada ne’e atu hotu lalais ka para hela hanesan de’it,” nia dehan.
Administradór postu administrativu Bobonaru, Tomas Barreto Haneriques, haktuir iha loron 04 fulan-Juñu 2025 nia parte submete ona pedidu ba Ministériu Obra Públika atu hakotu kontratu ba kompañia ne’e tanba konsidera abandona obra ne’e no servisu laiha kualidade.
Enkuantu estrada ho distánsia kilometru 1,7 ne’e kompañia Centeleziumen ezekuta ho valór kontratu $256,177.08 ne’ebé hahú implementa iha loron 21 fulan-Abríl 2022 data ramata 20 Abríl 2023.
Notísia Relevante: MOP sei reabilita estrada rurál pakote 13 iha Bobonaro
Jornalista : Sergio da Cruz
Editór : Cancio Ximenes
