Loré iha poténsia ba ekoturizmu no turizmu istóriku ne’ebé presiza dezenvolve
DILI, 23 Setembru 2026 (TATOLI) – Deputadu husi Bankada Partidu Demokrátiku (PD), Armando Lopes, hatete postu administrativu Loré, munisípiu Lautein, iha poténsia ba ekoturizmu no turizmu istóriku, tanba ne’e Governu presiza dezenvolve iha futuru atu hatama reseita ba Estadu no fó benefísiu ba komunidade lokál.
Nia dehan postu referidu ninia perfíl iha tempu portugés nu’udar postu administrativu ida iha munisípiu Lautein, maibé iha Indonézia militar sira esklui tanba sai baze subar fatin seguru ba FALINTIL sira.
Iha momentu ne’e, postu ida-ne’e pertense mós ba área Parke Nasionál Nino Konis Santana iha kbiit turistíku boot tebes ne’ebé iha poténsia atu dezenvolve.
“Hanesan ekoturizmu no natureza ai-laran boot, ne’ebé seidauk estraga no furak tebes ba vizitante sira. Ambiente hakmatek, la’o ain hodi esplora flora no fauna. Daudaun ita-nia Primeiru-Ministru la’o hela vizita fatin hirak ne’ebé nia uluk halo ligasaun polítika internál no esternál nian”, nia dehan.
Aleinde iha fatin ne’ebé di’ak hodi halo turizmu kulturál no komunitáriu uma lisan no tradisaun Fataluku (Makoa), Armando dehan komunidade sira sei haku’ak metin kultura, inklui arte múzika no uma tradisionál. Fatin ne’e mós famozu ba tradisaun kolleta mici kada tinan ne’ebé partisipa husi ema barak tantu doméstika komu estranjeiru hodi asiste eventu kulturál ida-ne’e.
“Bainhira dezenvolve ho di’ak bele hetan reseita ba Estadu no komunidade lokál”, nia afirma.
Durante resesu parlamentár, nia parte halo kontaktu eleitorál iha baze no simu preokupasaun povu Loré ne’ebé presiza hetan atensaun husi Governu, tanba kondisaun estrada atuál grave liu no fó impaktu ba movimentasaun komunidade atu asesu ba instalasaun saúde, edukasaun, ekonomia no fatin istóriku sira ne’ebé iha.
Lautein munisípiu ida husi Timor-Leste, ne’ebé lokaliza iha parte leste, halo fronteira ho tasi Timór no arafura estreitu (este), tasi Timór (súl), munisípiu Baukau no Vikeke (oeste) no estreitu wetar (norte).
Munisípiu refere iha postu administrativu neen, kompostu husi Lospalos, Lautein, Iliomar, Luro, Tutuala no Loré, ho suku 34 no aldeia 151.
Demografikamente Lautein iha populasaun 94.161 ho nia área kilómetru kuadradu 1.813,12, grupu populasaun ko’alia lia-Tetun, Fataluku, Makasae, Makalero, Sa’ane, no Makoa.
Pontu interese husi munisípiu referidu inklui Jaku, tasi-ibun Com, lagoa Umunira, pouzada Tutuala, Lagoa Ira-Lalaro no Ili Kere-Kere.
Entretantu, postu administrativu Loré, iha suku rua ho populasaun 5.346.
Jornalista: Nelson de Sousa
Editora: Maria Auxiliadora
