Estudante ETV Lifau Oekusi na’in-32 partisipa ezame PAP prepara ba ezame nasionál
OEKUSI, 23 Setembru 2026 (TATOLI) – Estudante finalista na’in-32 iha Eskola Tékniku Vokasionál (ETV) Tékniku Indústria Lifau iha Rejiaun Administrativa Espesiál Oekusi Ambeno (RAEOA), kuarta ohin, partisipa ona ezame Prova Aptidaun Profisionál (PAP) hodi prepara ba ezame nasionál 2026 ne’e.
Estudante na’in-32 ne’e, mai husi departamentu tolu maka hanesan Jestaun Ekipamentu Informatika, Mekanika Produsaun no Konstrusaun Sívil, ne’ebé abertura direitamente husi Diretór Servisu Rejionál Edukasaun Oekusi, Vincêncio Cono, hala’o iha Eskola Tékniku Vokasionál (ETV) Tékniku Indústria Lifau, lokaliza iha aldeia Mahata, Suku Kutete sub-rejiaun Pante-Makassar.
“Prova Aptidaun Profisionál ne’e hanesan etapa determinante ho meiu avalia kapasidade téknika, prátika, no teória ne’ebé estudante sira hetan ona durante tinan tolu iha ensinu sekundáriu tékniku vokasionál ne’e,” Vincêncio Cono, ko’alia iha sesaun abertura iha salaun ETV Lifau, ohin.
Dirijente Edukasaun Oekusi ne’e afirma katak ezame PAP ne’e la’ós de’it atu hetan valór akadémiku, maibé hanesan prova reál ba kualidade no preparasaun estudante tékniku sira nian ba futuru.
“Ezame PAP ne’e hanesan ponti ida-ne’ebé liga estudu akadémiku ho realidade merkadu traballu nian. Sira-nia kualifikasaun no kapasidade ne’ebé hatudu iha ezame ne’e sei sai kontribuisaun direta ba dezenvolvimentu sosio-ekonómiku iha RAEOA no Timor-Leste tomak,” nia hateten.
Notísia relevante:ME disemina informasaun ba dirijente Oekusi prepara ezame nasionál 2026
Iha biban ne’e, Reprezentante Diretór Eskola Tékniku Vokasionál (ETV) Tékniku Indústria Lifau Victor Manuel Neno esplika katak ezame Prova Aptidaun Profisionál ne’e, kulturalmente tama ona iha kurríkulu, ne’ebé estabelese ba programa Ensinu Sekundáriu Tékniku Vokasionál sira nune’e estudante désimu terseiru ano molok hasoru ezame nasionál tenke hetan uluk PAP.
Tan ne’e, nia orgullu tanba atividade PAP ne’e, hetan observasaun direita husi Servisu Edukasaun Oekusi, kona-ba rezultadu aprendizajen teória no prátika ne’ebé estabelesimentu ensinu referidu projeta ona.
Notísia relevante:Sekretáriu Estadu ME konsidera ETV Pássabe sai referénsia aplika aprendizajen ho dijitál
Entretantu, Prova Aptidaun Profisionál (PAP) nu’udar kritériu importante ida estudante husi eskola tékniku vokasionál sira, tenke partisipa no aprova molok bele tuir ezame nasionál.
Informasaun kona-ba ezame PAP
Definisaun PAP katak Prova Aptidaun Profisionál, ezame ida ne’ebé estudante finalista ensínu sekundáriu tékniku vokasionál tenke halo.
Prosesu: Molok tama PAP, estudante sira halo estájiu, hakerek relatóriu, no halo mini-monografia ka aprezentasaun projetu.
Kritériu: Aprovasaun iha PAP nu’udar ezijénsia prinsipál hodi garante katak estudante sira iha abilidade atu tuir ezame nasionál.
Jornalista: Abílio Elo Nini
Editór: Rafael Ximenes de A. Belo
