Projetu PDIM pakote 22 iha Bobonaru atinje 30%

BOBONARU, 23 Setembru (TATOLI) – Projetu husi Programa Dezenvolvimentu Integradu Munisipál (PDIM) 2026 pakote 22 iha munisípiu Bobonaru, ne’ebé asina kontratu ho kompaña manan-nain sira iha 25 Juñu 2026, daudaun nia progresu fíziku atinje ona 30% hafoin tama fulan tolu iha faze implementasaun.

Diretór PDIM Munisípiu Bobonaru, Rui Bere Mau, hatete katak progresu husi projetu sira varia tuir natureza no situasaun iha terrenu, balun husi 6% sa’e ba 30%, 40% no to’o 50%.

“Agora tama fulan tolu ona no jeralmente projetu sira atinje ona 30%”, nia dehan ba Tatoli kuarta-feira ne’e.

Rui Bere esplika katak Autoridade Munisípiu Bobonaru planeia atu projetu sira balun finaliza iha Dezembru 2026, inklui projetu seluk ne’ebé tenke atinje progresu 70% no balun to’o 100%.

Nia hatete projetu kontinuasaun ba konstrusaun irrigasaun Raegeren besik finaliza ona no tuir alvu iha Outubru nia-laran bele remata 100%, enkuantu projetu bee-moos sira planeia atu finaliza iha fulan-Dezembru.

“Bee ne’e ami la dúvida, maibé ami duvida liu mak projetu uma sira. Ita-nia enjeñeiru Obra Públika no PDIM loroloron kontinua halo monitorizasaun”, nia dehan.

Nune’e, PDIM mós identifika projetu balun ne’ebé konsidera tarde liu iha implementasaun, inklui konstrusaun eskola ida iha Saburai no postu saúde iha suku Tapo.

Projetu seluk ne’ebé enfrenta atrazu mak konstrusaun armazein rai ai-moruk iha Balibó, maski lokalizasaun projetu nian besik estrada ibun.

Aleinde ne’e, Rui Bere fundamenta katak konstrusaun no reabilitasaun Ensinu Báziku Sentrál (EBC, sigla portugés) Dom Caileto mós enfrenta atrazu.

“Ida tarde mak eskola EBC Dom Caileto, tanba kompañia ne’e kaer uma rua, ida reabilitasaun ne’e agora prega ona kalen, falta foru ho nahe keramik. Agora ida sala tolu ne’e foin cor sinta iha okos, ne’ebé enjeñeiru Obra Públika ho PDIM ne’e kuaze lorloron observa”, nia dehan.

Rui hatete katak enjeñeiru Obra Públika hamutuk ho PDIM kontinua halo monitorizasaun regulár, inklui halo akompañamentu besik ba projetu sira ne’ebé nia progresu seidauk tuir planu, atu garante implementasaun projetu sira bele la’o tuir prazu ne’ebé determina.

“Semana oin ami sei bolu kompañia sira mai enkontru ho Prezidente Autoridade Munisípiu Bobonaru atu rona orientasaun ruma para sira bele aselera serbisu ne’e hodi finaliza tuir ita-nia planu”, nia informa.

Autoridade Munisípiu Bobonaru iha tinan-2026 ne’e hetan projetu Programa Integradu Dezenvolvimentu Integradu Munisipál (PDIM) hamutuk 22 ho totál orsamentu millaun $2.750.460.

Projetu hirak ne’e mak hanesan konstrusaun bee-moos sistema bomba eletrisidade iha Aidabaleten Foho, suku Aidabaleten, postu administrativu Atabae, ho valór orsamentu rihun $180, kanalizasaun bee-moos sistema bomba eletrisidade iha aldeia Ai-Asa, suku Leo-hitu, postu administrativu Balibó ho valór rihun $210, konstrusaun muru hale’u edifísiu Komisaun Nasionál Eleisaun no salaun apuramentu munisipál rihun $72.

Konstrusaun uma ba fatin rai ai-moruk iha Balibó Vila ho totál orsamentu rihun $45, konstrusaun postu saúde iha suku Tapo, postu Bobonaru ho orsamentu rihun $120, konstrusaun saladeaual tolu iha Ensinu Báziku Filiál Gelokaet, suku Ritabou, postu Maliana ho totál orsamentu rihun $72, konstrusaun bee-moos iha aldeia Lalis, suku Cowa, postu Balibó ho valór orsamentu rihun $90, reabilitasaun sistema kanalizasaun bee-matan Bol Thama no Laho, suku Tapo-Memo, postu Maliana ho valór rihun $108.

Notísia relevante: PDIM 2026 iha Bobonaru: Empreza liu 70 kompete konkursu públiku ba projetu 22

Konstrusaun postu saúde, iha suku Lontas, postu Lolotoe ho valór rihun $78, reabilitasaun sistema bee-moos gravitasaun iha aldeia Silagolo, Dilai no Anon, suku Lupal no Guda, postu Lolotoe ho valór rihun $180, kanalizasaun bee-moos sistema bomba elétrika iha aldeia Atubuti, Tuturema, Aitutu, suku Raiheu no Atudara, postu Kailaku ho valór rihun $105, konstrusaun irrigasaun Sordoli ho totál orsa rihun $270, konstrusaun merkadu iha postu Lolotoe ho osan rihun $150, kontinuasaun konstrusaun merkadu Mau-Mali rihun $294.

Konstrusaun kampu multifunsaun Balibó rihun $54, kontinuasaun konstrusaun irrigasaun Raegeren rihun $21, konstrusaun saladetolu iha EBF Ozo, suku Lontas rihun $72, reabilitasaun kanalizasaun bee-moos iha aldeia Oceli, suku Guda rihun $60, konstrusaun postu saúde no rezidénsia pesoál saúde iha suku Oe-leu rihun $108, konstrusaun sala tolu iha EBC Dom Kaileto no reabilitasaun sala neen iha Eskola Primária Dom Kaileto multisetór ho valór rihun $150, konstrusaun sala neen iha Poeleu, suku Male-Ubu ho valór rihun $150, no ikusliu konstrusaun sala tolu iha EBF Paralelu Saburai ho kustu rihun $66.

Notisía relevante: Konkursu públiku ba projetu PDIM 2026 iha Bobonaru tenke imparsiál

Jornalista: Sergio da Cruz

Editora: Maria Auxiliadora