Servisu Aduaneiru Batugadé arrekada taxa ba kofre Estadu millaun $1.6
BOBONARU, 23 Setembru 2026 (TATOLI) – Servisu Aduaneiru Batugadé arrekada taxa ba kofre Estadu husi Janeiru to’o Setembru tinan-2026 ne’e hamutuk millaun $1.6, Diretór Aduaneiru Munisípiu Bobonaro, Nuno Nogueira, informa.
“Taxa ba pontu integradu liuliu Munisípiu Bobonaru nian hamutuk millaun $1.6 maibé antes tama ami bele rekolla millaun $2,” nia dehan ba TATOLI iha Mota Ain, ohin.
Rezultadu taxa arrekada ne’e maihusi taxa importasaun, taxa venda no sigarru. Haree ba persentajen, taxa importasaun pursentu 2.5, taxa venda pursentu 2,5 nune’e hamutuk 5%. Kompara ho taxa tinan kotuk hamutuk millaun $2.
Nuno Nogueira esplika durante nia servisu tinan ida iha Aduaneiru Batugadé Bobonaru nia funsionamentu Batugadé nian la’o normál hela. Maibé, movimentasaun ema aumenta maka’as.
“Dahuluk ita atende ba pasajeiru ne’ebé tama no sai, depoiz iha mós meiu transporte tama-sai. Transporte privadu, Governu ikus mak karreta ne’ebé tula naha ka karreta negósiu (merkadu). Ida-ne’e akontese dezde estabelesementu ponte Tiba Suai,” nia dehan.
Enkuadramentu legál no papél servisu aduaneiru
Bazeia ba Kódigu Aduaneiru no Lei Orgánika Autoridade Aduaneira (Diresaun Jerál Alfándega) iha Timor-Leste, Servisu Aduaneiru iha mandatu krítiku hodi asegura seguransa nasionál, fasilita komérsiu leste-oeste no fronteirisu, nune’e mós Kontrola no arrekada reseita fiskál sira hanesan taxa importasaun, IVA ka taxa vendas ba kofre Estadu. Arrekadasaun reseita ne’e sai hanesan pilar prinsipál ba Orsamentu Jerál Estadu (OJE).
Hanesan postu fronteirisu estratéjiku iha liña fronteira terrestre ho Indonézia, Batugadé jere fluxu komérsiu boot, ne’ebé presiza kumprimentu estritu husi importadór no esportadór sira hodi submete dokumentu aduaneiru sira ne’ebé legál no transparente.
Notísia relevante:Governu altera kódigu aduaneiru atu kumpre kondisaun importante ba adezaun OMK
Kona-ba ekipamentu, Diretór Aduaneiru Munisípiu Bobonaro, Nuno Nogueira, informa katak iha mákina scanner tolu ne’ebé hodi bele haree ba ema nia isin-lolon hotu hodi halo identifikasaun hafoin halo ezaminasaun.
Mákina kargo ida, vataza nian rua inklui bodi scanner hamutuk haat (4). Mákina hirak-ne’e sufisiente ona hodi halo servisu. Enkuantu, rekursu umanu menus tebes. No, nia informa ona ba nasionál hodi sira anota no sei halo rekrutamentu. “Ami hein katak bele halo mudansa no haruka funsionáriu mai”.
“Durante iha ha’u-nia servisu tinan ida iha Aduaneiru ne’e apreensaun ba sasán barak loos ne’ebé kontra bandu hanesan sigarru eletróniku, samurai, tua, farda artemasiál inklui kilat manu.Sasán sira-ne’e sei enkamina ba ministériu públiku no haruka ba nasionál hodi halo despaxu hodi selu taxa no fó penalidade ba sira,” nia konklui.
Iha biban ne’e, Autoridade aduaneira ne’e apela ba importadór no esportadór sira katak atu importa ka esporta sasán ruma presiza koopera atu kontribui dokumentu relevante ho sasán sira.
Notísia relevante:Alfándega rekolla reseita millaun $81-resin ba kofre Estadu
Jornalista : Osória Marques
Editór : Rafael Ximenes de A. Belo
