Alfándega rekolla reseita millaun $81-resin ba kofre Estadu
DILI, 10 Agostu 2026 (TATOLI)-Autoridade Aduaneira (AA/Alfándega) rekolla, entre Janeiru no Agostu 2026, reseita hamutuk $81.561.387,93 ba kofre Estadu.
Komisáriu Alfándega, Joanico Pinto, informa katak reseita ne’ebé rekolla ne’e maioria husi Portu Tíbar hamutuk $78.877.484,12, Fronteira Terrestre Batugadé $1.319.902,52, Aeroportu Internasionál Prezidente Nicolau Lobato (AIPNL) Dili $811.882,02, Fronteira Salele $369.569,10, Fronteira Sakato $125.794, 75, Oésilo-Oekusi $7.633,93, post office Kaikoli $27.653,63, Tunubibi-Bobonaru $9.030,06, Aeroportu Suai $8.009,62, no Bayu-Undan $4.428,36.
Nia subliña katak husi reseita sira ne’e, inklui implementa penalidade ba importadór sira ne’ebé komete infrasaun sira iha períodu Janeiru to’o inísiu Agostu ne’e.
Maski kada tinan Alfándegan rekolla reseita, sira mós hasoru difikuldade iha rekursu umanu atu hala’o serbisu.
Kestiona kona-ba rekrutamentu ba funsionáriu na’in-80, Joanico Pinto dehan rekruta daudaun la’o hela no teste eskrita hotu ona hein anunsia rezultadu atu hakat ba faze entrevista nian.
“Bainhira rezultadu iha ona, antes halo kontratu, tuir planu ne’ebé iha, obrigatóriu sira sei bá tuir formasaun karáter no formasaun integrada kona-ba koñesimentu báziku Alfándega nian, ne’ebé prosesu hotu la’o. Tinan ne’e sei konkui no tinan oin sei hala’o serbisu”, dehan.
Pesoál funsionáriu Alfándega ne’ebé daudaun eziste hamutuk 250, maibé balun moras no seluk atu tama idade reforma.
Jornalista: Arminda Fonseca
Editora: Maria Auxiliadora
