iklan

EKONOMIA, HEADLINE

Governu altera kódigu aduaneiru atu kumpre kondisaun importante ba adezaun OMK

Governu altera kódigu aduaneiru atu kumpre kondisaun importante ba adezaun OMK

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen Tatoli/Egas Cristóvão

DILI, 04 novembru 2022 (TATOLI)–Ministru Finansa (MF), Rui Augusto Gomes, sesta ne’e, aprezenta projetu dekretu-lei kona-ba alterasaun dahuluk dekretu-lei númeru 14/2017, loron 05 abril, kona-ba kódigu aduaneiru iha reuniaun Konsellu Ministru (KM) no hetan ona aprovasaun.

“Alterasaun lejizlativa ne’e hakarak atu kumpre kondisaun importante ida ba konkluzaun prosesu adezaun ba Organizasaun Mundiál Komérsiu (OMK) no atu aliña ho kódigu aduaneiru ho kuadru jurídiku ne’ebé mak regula OMK no ninia membru sira,” Minsitru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Aleinde ne’e, bele asegura komparasaun no previzibilidade hosi interpretasaun no aplikasaun lejizlasaun nasionál hodi haburas troka komersiál no hamenus kustu sira.

Notísia relevante: CCI-TL husu Governu fasilita empreza nasionál kompete iha ASEAN no OMK

Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.

Hanesan país observadór, Governu estabelese grupu traballu ba OMK hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.

Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.

OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!