DILI, 05 outubru 2022 (TATOLI)–Kámara Komérsiu Indústria Timor-Leste (CCI-TL, sigla portugés) husu Governu atu fasilita empreza nasionál atu kompete negósiu oin-oin iha Asosiasaun Nasaun Sudeste Aziátiku (ASEAN, sigla inglés) no Organizasaun Mundiál Komérsiu (OMK).
“Ha’u husu Governu ajuda ita-nia setór privadu sira, lae sei la kompete ekonómikamente ho setór privadu sira iha ASEAN no OMK. Fasilita liuhosi asesu kréditu iha banku ho funan kiik, atu nune’e emprezáriu sira bele empresta osan harii indústria hahú ho eskala kiik, médiu to’o boot,” Prezidente CCI-TL, Oscar lima, hateten ba Agência Tatoli, iha Bebonuk, tersa ne’e.
Notísia relevante: MKAE aprezenta progresu adezaun OMK ba KM
Aleinde ne’e, nia mós husu ba Governu tenke kapasita setór privadu nasionál liuhosi formasaun ba jestaun emprezariál no apoiu sira seluk atubele adapta-an ho setór privadu sira seluk iha ASEAN no OMK hodi kontribui ba prosesu dezenvolvimentu nasionál.
Oscar lima dehan, Timor-Leste rasik daudaun ne’e ekonomikamente, empreza nasionál rasik seidauk bele kompete ho entdade sira iha asosiasaun mundiál tanba sei falta fasilidade no finansiamentu.
“Ha’u hateten loloos katak setór privadu agora daudaun hasoru problema finanseiru no fasilidade apoiu sira seluk, maibé setór privadu Timor-Leste prontu ona atu tama iha setór privadu mundiál iha futuru,” nia akresenta.
Nune’e, emprezáriu timor-oan ne’e iha esperansa Governu bele injeta rekursu sira ba setór privadu atu hahú estabelese indústria oinoin, tanba to’o oras ne’e kuaze produtu hotu importa hosi rai-li’ur.
“Bainhira setór privadu sira halo ona indústria oin-oin mak sei limita produtu rai-li’ur nian,” nia tenik.
Jornalista : Arminda Fonseca
Editora : Julia Chatarina
