STAE Oekusi destrui buletin votu eleisaun anteriór no dokumentu eleitorál kaduka
OEKUSI, 23 Setembru 2026 (TATOLI) – Ekipa Sekretáriadu Tékniku Administrasaun Eleitorál (STAE) hamutuk ho Autoridade Rejiaun Administrativa Espesiál Oekusi Ambeno (RAEOA), kuarta ohin, hala’o destruisaun ba buletin votu Eleisaun Prezidensiál 2022 no Eleisaun Parlamentár 2023 inklui dokumentu eleitorál sira-ne’ebé kaduka ona, iha ponte Noefefan suku Lifau sub-rejiaun Pante Makasar.
Diretór STAE Oekusi, Gregoria dos Santos Neno, hateten, responsabilidade ida-ne’e hala’o depoisde liu ona tinan ida husi proklamasaun rezultadu eleisaun, no prosesu destruisaun ne’e, hetan ona autorizasaun husi Tribunál Rekursu.
“Seremónia destruisaun ba materiál eleitorál sira-neʼebé uza ona iha Eleisaun Prezidensiál 2022 no Eleisaun Parlamentár 2023, no dokumentu eleitorál sira-ne’ebé kaduka ona,” Diretór STAE Oekusi, Gregoria Neno, hateten iha iha edifísiu STAE Oekusi, ohin.
Nia informa, atividade ida-ne’e hala’o bazeia ba responsabilidade ne’ebé atribui ba STAE, iha prevista iha artigu 68, númeru 2, husi Dekretu Governu Númeru 21/2017, loron 17 fulan Maiu, no artigu 55, númeru 02, husi Dekretu Governu Nú. 7/2017, loron 27 Fevereiru, kona-ba prosedimentu votasaun, kontajen no apuramentu rezultadu.
Ezekutivu ne’e afirma katak responsabilidade ida-ne’e hala’o depoisde liu ona tinan ida husi proklamasaun rezultadu eleisaun, no prosesu destruisaun ba buletin votu sira-ne’ebe, hetan ona autorizasaun husi Tribunál Rekursu, liuhusi karta referénsia númeru 71/SP.TR/IX/2026, iha loron 08 Setembru 2026, bazeia ba pedidu STAE referénsia númeru 10/DG-STAE/MAE/VI/2026, iha loron 09 fulan-Juñu 2026 iha nível munisípiu.
“Materiál sira-ne’ebé destrui, hanesan buletin votu, akta, lista votantes, tinta indelivél, kartaun eleitorál ne’ebé kaduka ka aat, ne’ebé rekolla ona durante Atualizasaun Baze Dadus Eleitorál, no dokumentu eleitorál seluk ne’ebé kaduka ona, tuir inventáriu no prosedimentu ne’ebé determina,” nia afirma.
Notísia relevante:
Dirijente ne’e hateten, atividade ida-ne’e importante tebes tanba hatudu katak materiál eleitorál sira, husi nia utilizasaun to’o nia eliminasaun, tenke jere ho responsabilidade, integridade, transparénsia no rastreabilidade.
“Seremónia ida-ne’e la’ós de’it halo destruisaun materiál, maibé reprezenta konkluzaun ida ba siklu jestaun materiál eleitorál ba eleisaun sira liubá, no sai parte husi preparasaun institusionál STAE nian, atu kontinua hadi’a jestaun no prosedimentu eleitorál ba eleisaun sira iha futuru, inklui Eleisaun Prezidensiál 2027,” nia hateten.
Iha biban ida-ne’e, nia reprezenta ekipa STAE hato’o agradese ba Komisaun Nasionál Eleisaun (CNE), STAE Nasionál, Tribunál Rekursu, Autoridade Munisípiu, Polísia Nasionál Timor-Leste (PNTL), partidu polítiku sira no instituisaun hotu ne’ebé kontribui ona ba prosesu ida-ne’ebé hala’o ho transparénsia, livre no justu.
“Ikusliu, ha’u reafirma kompromisu STAE RAEOA atu kontinua servisu ho imparsiálidade, neutralidade, profisionalizmu no respeitu ba lei, hodi garante integridade no konfiansa iha administrasaun eleitorál,” nia hakotu.
Notísia relevante:Governu la prodús buletin votu espesifiku ba EhD iha Eleisaun Parlamentár
Enkuantu, Sekretáriu Rejionál ba Asuntu Administrasaun no Finansa, Salvadór da Cruz, reprezenta Prezidente Autoridade RAEOA hateten, prosesu destruisaun presiza hala’o hodi prepara fali materiál foun ba Eleisaun Prezidensiál 2027 no Eleisaun Parlamentár iha 2028.
“Materiál sira-ne’e kuandu liu ona tinan ida, ita bele destruisaun, tanba tinan oin 2027, ita sei halo tan Eleisaun Prezidensiál no kontinua ba 2028 Eleisaun Parlamentár, entaun sasán ne’ebé kaduka ona, la presiza utiliza ona, nune’e ba oin ita prepara buat foun atu la’o justu no seguru iha Oekusi,”
Notísia relevante:STAE presiza maximiza edukasaun eleitorál iha 2026
Entretantu, durante prosesu destruisaun hetan observasaun no akompamentu husi Polísia Nasionál Timor-Leste (PNTL), Komisaun Nasionál Eleisaun (CNE) no partidu polítiku sira.
Jornalista: Abílio Elo Nini
Editór: Rafael Ximenes de A. Belo
