DILI, 08 marsu 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten Governu sei la prodús buletin votu espesífiku ba Ema ho Defisiénsia (EhD) liu-liu ema ho defisiénsia matan iha Eleisaun Parlamentar (ElPar).
Notísia Relevante: Partidu 24 sei konkorre iha eleisaun parlamentár 2023
“Tanba iha alterasaun lei eleitorál ba Parlamentu Nasionál ne’e STAE opta de’it buletin votu ho modelu matrix úniku, Tanba ne’e, iha eleisaun parlamentar ita la prodús buletin votu espesifiku ba maluk portadora matan sira no ita sei prodús buletin úniku ba ema normál no defisiénsia maibé diferensa mak ita prodús matrix. Maibé matrix hanesan tipu envelope ida hatama buletin ba laran no iha nia leten mak uza letra brille, nune’e lori fasilita maluk defisiénsia matan halo leitura hodi bele eskolla kandidatura ne’ebé nia hakarak fó nia votu sein asisténsia hosi ema ruma,” Diretór Jerál STAE ne’e hateten ba Agência Tatoli iha programa “Hakat ba Uma Fukun” iha studio Faró, segunda ne’e.
Kona-ba matrix ne’e, STAE ho Komisaun Nasionál Eleisaun (CNE) halo estudu komparativu ho parseiru no tékniku sira, oinsá mak bele fasilita ema ho defisiénsia matan iha eleisaun parlamentár maibé atu tékniku halo nia servisu ho profisionál mak presiza iha baze legal, nune’e prosesu sira-ne’e bele la’o.
“Ami halo preparasaun tékniku tanba tinan kotuk ita halo koordenasaun ho Komisaun Nasionál Eleisaun ho UNDP hodi fó formasaun ba sira no UNDP mós promove hela ba maluk ho kondisaun defisiensia matan sira maibé presizamente mak iha baze legál,” nia dehan
Notísia Relevante: PPN husu parte hotu asegura Eleisaun Parlamentár la’o ho dame
Tuir nia, kada estasaun votasaun sei tau template ka matrix rua-rua iha territóriu nasionál no mós iha rai-li’ur.
“Ita-nia planu Governu sei gasta $3.800 hodi prodús matrix ka template bulletin votu ba EhD iha Eleisaun Parlamentar 2023. Tuir peskiza ne’ebé iha hanesan Indonézia ba matrix ka template ne’e ho valór sentavus $030 no dala ruma $1,” nia esplika.
Antes ne’e, Asesór Prinsipál Asuntu Inklzuaun Sosial Prezidénsia Repúblika, Gaspar Afonso, hateten sei servisu hamutuk ho STAE atu fahe informasaun kona-ba letra braille iha sistema ne’e.
Tanba, nia dehan, iha ema ho defisiénsia (EhD) matan iha Timor-Leste na’in-200 ne’ebé hatene hakerek no lee maibé seidauk intende di’ak sistema eleisaun ho letra braille.
Notísia Relevante: Prezidente Repúblika dekreta loron eleisaun Parlamentár iha 21 maiu
Jornalista : Osória Marques
Editór : Cancio Ximenes
