DILI, 03 marsu 2023 (TATOLI)—Prezidente Parlamentu Nasionál, Aniceto Longuinhos Guterres Lopes, husu ba parte hotu atu iha responsabilidade asegura eleisaun Parlamentár 2023 la’o ho dame.
Notísia Relevante: Prezidente Repúblika dekreta loron eleisaun Parlamentár iha 21 maiu
“Ita hotu iha responsabilidade atu asegura prosesu molok no depois eleisaun parlamentár ida ne’ebé lao ho dame no hakmatek. Ambiente ida-ne’e, ezije parte hotu-hotu atu hatudu kapasidade no maturidade polítika iha linguajen, atitude no komportamentu durante ezersísiu demokrátiku ida ne’e,” Prezidente Parlamentu Nasionál, Aniceto Longuinhos Guterres Lopes, hateten iha nia diskursu bainhira reprzenta Prezidente Repúblika, José Ramos Horta, prezide serimónia komemorasaun loron nasionál veteranu iha Palásiu Governu, sesta ne’e.
Nia hateten, iha loron 21 fulan-maiu 2023, timoroan sira sei hasoru eleisaun parlamentár, hodi lejítima alternansia reprezentasaun povu no lideransa podér ezekutivu ho nia kolaborador sira.
Hanesan iha eleisaun hirak liu ba, nia dehan, hatudu katak sidadaun sira halo teste no kontesta rasik sira-nia opsaun polítika no dirije mensájen ba líder polítiku sira no figura eminente sira kona-ba importánsia komunikasaun ka dialogu, halo konsertasaun polítika, halo korresaun ba komportamentu polítiku hodi serve interrese komum, interrese Estadu tomak.
Momentu krusiál no desizivu sira hanesan ne’e, tuir nia, povu hein no presiza liu mensájen ne’ebé edukativu, informativu ho programa ne’ebé atu lori moris di’ak ba povu.
Timoroan hotu-hotu tenke konkorda katak, iha Timor-Leste, labele iha espasu ba rasizmu, divizionixmu, violénsia iha forma oioin.
“Partidu polítiku hotu-hotu iha devér morál no polítiku atu asegura pás no estabilidade no sensibiliza nia militante no simpatizante sira ho hanoin, atitude no komportamentu síviku no responsavé. Grupu ka organizasaun sosiál no profisionál sira, iha mós dever tomak atu kontribui ba pás, estabilidade no ba dezenvolvimentu tuir natureza ida-idak nia kna’ar.
Líder Segundu Órgaun Soberania ne’e hateten, Timor-Leste bele mantein dame no estabilidade, hodi hakat ba eleisaun parlamentár ne’ebé hakmatek, livre no justu, hodi forma governasaun ne’ebé estavél, reforsa instituisaun Estadu ni’an sira, reforsa kumprimentu lei no orden no lori Timor-Leste ba dezenvolvimentu inkluzivu no sustentavél.
“Valorizasaun loloos ba veteranu no erói nasionál sira mak ita hotu-hotu nia vontade no kapasidade atu transforma paíz ne’ebé independente ona sai fatin hakmatek, moris iha justisa, prosperidade, fraternidade no solidariedade,” nia hateten.
Notísia Relevante: Partidu 24 sei konkorre iha eleisaun parlamentár 2023
Jornalista : Nelson de Sousa
Editór : Cancio Ximenes
